close
Joaquín Leguina

Joaquín Leguina

2024-03-27Joaquín Leguina739Visitas

Corría l’añu 1964 y en Bilbao acababa principiar el cursu na Facultá de Ciencies Económiques… de Valladolid. Y ye que d’aquella la universidá del País Vascu entovía nun esistía. Taba la de Deusto, que yera de los cures, y el restu pertenecía al Distritu Universitariu de Valladolid. Los asturianos que queríemos facer Económiques teníemos que dir a ésa, por prosimidá xeográfica, anque yo tenía familia en Madrid y prefería estudiar ellí. Nun pudo ser. En Bilbao, axuntámonos un grupu d’asturianos la mayoría procedentes de la Escuela de Comerciu de Xixón, pero non toos. Yera, como podrá entendese pola fecha, en plena dictadura franquista y ún nun taba avezáu a sentir falar a la escontra del Réxime masque en «petit comité». Pues bien, al pocu tiempu yá empezó aquello a referver col entamu d’actos escontra la dictadura y, recuérdolo como si tuviere viéndolo, nuna de les primeres asamblees con un Salón d’Actos atarraquitáu, a un rapaz dalgo mayor que nosotros que yera’l que la dirixía, con bigotón, pelo bastante llargo y una gran bufanda de rayes, arengando a les mases estudiantiles pa protestar contra «l’autoridá competente». Aquel rapaz llamábase Joaquín Leguina, y fue un de los primeros referentes que yo tuvi nel primer añu d’Universidá. Llueu, yá n’otros cursos, principiaron a apaecer otres figures, munches arreyaes a un movimientu desconocíu que se llamaba ETA (Echevarrieta, Orbeta…) Pero esa yá ye otra historia. Hoi, que lleo qu’un tal Joaquín Leguina se pasa al bandu d’una pelamangos con ínfules de gran política, por un preciu de 100.000 euros, noto como una resquiebra nel mio interior y siento qu’un pequeñu «idolillu» esapaeció del mio olimpu. Yá sé que venía d’atrás, pero aguanté lo que pude. En fin, murniu día.