VENEZUELA.- Celebráronse eleiciones en Venezuela, con asistencia d’interventores estranxeros, ente ellos el nuestru señor Trevín, que nun ye un «pelamangos» cualquiera pues na menos que presidió’l Gobiernu Asturianu, eleiciones que ganó l’herederu del chandal del señor Chaves. Esti Maduro, que nun sabemos si lo tará daveres, xuró’l cargu y anda escoyendo yá’l so nuevu gobiernu. Pero los perdedores qu’encabeza’l señor Capriles nun tan conformes y piden que se faiga otru recuentu «votu por votu». Yo entiendo que manca muncho perder namás que por 250.000 votos, pero ye lo qu’hai. En Venezuela van celebrándose, col mesmu sistema, tropecientes votaciones, por cierto, siempre ganaes por eso que se da en llamar «el chavismu», pero como la diferencia yera grande pues aceptábase. Como agora ye pequeña, entós nun val. Hai que recordar que’l primer trunfu d’Aznar sobro Felipe González fue por menos d’esos votos y a naide se-y ocurrió cuestionar les votaciones. Nun digamos yá del primer trunfu del ínclitu George Bush (fíu) sobro aquel Al Gore, llueu ecoloxista, que tuvo que decidir el Tribunal Supremu. En fin, el diariu El País, como siempre, alienda encesamente a la oposición venezolana. Son mui dueños, pero que nun saquen que la diferencia ye pequeña porque eso nun val.
CIMAVILLA.- A los políticos y a otra muncha xente «d’orde» nun-yos presta l’anunciu d’un grupu vecinos de Cimavilla
de formar unos grupos «d’bservadores» de la realidá, nos fines de selmana. Y lo que, según entendí yo, yera columbrar si se facíen desmanes pa, nesi casu, avisar a la policía, tómenlo como si se tratare de Charles Bronson col vate de beisbol y les armes blanques o negres. La cosa nun ye asina. Yo toi d’alcuerdu en que naide nun se pue tomar la xusticia pela so mano, nin metese en xeres que namás son responsabilidá de les fuerces d’orde públicu. Faltaría más. Pero nestos casos (y n’otros) hai que facer siempre l’exerciciu de ponese en llugar de los demás. ¿Que tien que facer, por exemplu, una familia a la que se-y estroza’l so pequeñu negociu una selmana sí y otra tamién? ¿Cruciase de brazos y poner la otra mexella? N’efeutu, naide nun debe sustituyir a la policía… siempre qu’ésta cumpla cola so obligación, porque sinón pasa como nel Oeste, que ye la llei del más fuerte. Yo, puestu nel casu de los sufridores vecinos, nun diba mirar pa otru llau.
ACOSU ESCOLAR.- Ye como la falta de respetu de los alumnos a los profesores, el despreciu de los padres a los mesmos profesores, el nun reconocer les faltes del to fíu porque’l mio fíu «nun pudo facelo»: falta dafechu d’educación. Pero nun sólo per parte de los «acosadores», esos cobardes que s’escuenden tres el grupu, o tres la fuercia pa metese colos débiles o los «distintos», sinón tamién de los demás compañeros que lo saben y callen, nuna especie d’ «omertá» xuvenil pa que los dexen tamién pertenecer al «grupu», pa que nun los marxinen. Nel colexu siempre hubo «matones» y «chuletas», los que llamábemos «abusones». Pero’l restu la xente siempre nos revolvíemos escontra ellos recriminándo-yos lo que facíen: «Abusón, abusa de mí», se-yos dicía anque ún fuere más pequeñu y eso pudiere costa-y una marmellada. Pero agora a los rapazos incúlcase-yos lo de «tu nun te metas en xareos», «tu a lo tuyo», anque veas que al to llau hai dalguién que necesita una mano. La falta solidaridá y l’individualismu paséense pela nuestra sociedá y asina vamos viendo como nos arrempuñen tolos drechos que, xuntos, consiguiéremos. Eso sí qu’había que lo dar n’Educación pa la Ciudadanía.
AFUERA NUN PINTAMOS NADA.- Falo de la política esterior d’esti país llamáu España. Ta claro que dientro de les
nuestres coordenaes, de puertes pa dientro, esti gobiernu ye un desastre, pero polo menos, porque eso nun cuesta perres, de cara al esterior podíen tener una actuación un migayín más honrosa. Nun ye asina. Nel tema del Sahara, nel que teníemos que tener un protagonismu exemplar, por ser colonia nuestra hasta hai cuatro díes, nun pintamos nada. Y asina, una resolución que se presentó nel marcu de la ONU nel sen de que los propios Cascos Azules pudieren caltener los drechos humanos ellí, plantando cara a los abusos de Marruecos, tuvo de ser retirada por falta sofitos, ente otros el d’España. O un compromisu que’l Ministru d’Esteriores caltuvo col Presidente de l’Autoridá Nacional Palestina, nel sen de qu’España diba a abrir un Consuláu en Gaza, quedó en nada, supongo que poles presiones de los que sabemos: Xudíos y Norteamericanos. Pero eso sí, dixéron-yos a los palestinos que Consuláu non, pero qu’equí tamos pa lo que faiga falta, como se diz a un recién conocíu pa quedar bien. Supongo que los palestinos mandaríennos a la mierda.
