Cuando nomaron a Emilio Marcos Vallaure pal puestu de Conseyeru de Cultura, escribí amosando la mio satisfaición por tal fechu («¡Qué bon vasayu, si hubiera bon señor!»). Vallaure yera «un de los nuestros», y asina lo espeyaba’l so curriculum asturianu y asturianista. Tamién dixi que nun lo diba a tener fácil, pero más, camentaba yo, poles circunstancies ayenes que poles propies. Güei, unos cuantos meses depués, tengo que rectificar aquello qu’escribí. Abúltame que’l so llabor al frente de Cultura supón una deceición pa los que lluchamos pola dignidá y meyora del nuestru mayor bien cultural: la llingua asturiana.
Porque los supuestos amores que tenemos, hai que los demostrar. Talo qu’asocede col amor a la nuestra pareya, a la que nun abasta con tar tol día diciéndo-y lo muncho que la queremos, lo qu’hai que facer ye demostra-y con fechos qu’eso ye asina, y que les nuestres pallabres nun se dicen sólo p’ afalaga-y los oyíos. Ya sabíemos, y amás naide-y lo pidió, que Marcos Vallaure nun diba a proclamar la Oficialidá. Yera dalgo que nun dependía d’él, anque se tuviere agradecío dalguna pallabrina nel sen de que, dalgún día podría algamase. Nun lu comprometía en nada y sedría una declaración de bona voluntá. Pero bono, tampoco nun taba obligáu a ello.
Lo que sí esperábemos yera una tratu haza la llingua, y a los que la representen, enforma más decidíu. Por exemplu,
qu’ente les sos primeres reuniones, aconceyara cola Presidenta de l’Academia de la Llingua Asturiana y facilitara un alcuentru col Presidente del Gobiernu Asturianu señor Cascos. Actu, per un llau protocolariu pa visualizar ante’l pueblu asturianu el so apreciu pola nuestra llingua tradicional y, per otru, prácticu, pa falar de tolos pilancos y dificultaes peles que, nesti momentu ta pasando. Que sepamos, depués de tantos meses, esi alcuentru col Presidente entá nun se fizo, pese a que munchos asturianistes s’incorporaron con illusión a les sos files y poníense percontentos porque nos discursos falaba de «País».
Pero más gordo, inclusive, qu’esta falta de cortesía pa cola Academia y la so Presidenta, ye’l «palu» que se-y da col tema de los Presupuestos. L’Academia ve rebaxáu’l suyu nun 27 %. Más d’una cuarta parte del que tenía nel 2011. Hai que tener en cuenta, que la institución llingüística llevaba ya unos cuantos exercicios coles perres conxelaes y numberoses dificultaes pa poder desendolcar el so llabor. Esto supón, pa esti nuevu exerciciu, pasar de los 230.000 euros con que cuntaba, a los 167.900 que va a tener asignaos.
Podía pensase que los recortes son llóxicos, nun momentu económicu difícil como nel que tamos, pero la brutalidá del recorte abúltame que ye demasiao. Pa ver lo que representa’l dineru que se-y da a l’Academia, lo meyor ye comparalu con otres cifres otorgaes pa otros eventos o instituciones. Asina, la Selmana Negra de Xixón tenía en 2011 un presupuestu de 211.000 euros (pa «fundir» nuna sola selmana). El de Laboral Centro de Arte y Creación Industrial creo que yera al rodiu de 1 millón, cuatrocientos mil euros. Y polo que trascendió a la prensa, el famosu y lloráu Centru Niemeyer, entamó una esposición de Carlos Saura que costó la cifra de 473.000 euros. ¡Sólo pa una esposición! Pero ye que, amás, nun toles instituciones asturianes sufren recortes. Por exemplu, pa la Fundación Amigos de la Opera, los del «oviedín del alma», nun sólo nun hai recorte, sinón qu’hai una suba del 27 %, la mesma que pa l’Academia, pero al «resve», pasando de 194.000 euros a los 250.000 que tienen pa esti añu. Y a la música sinfónica (OSPA) recórten-y namás un 6 %, en llugar del 27 %. Claro qu’eso ye cultura en serio, y lo nuestro, ya sabemos, la boina y el cuchu. Pal Muséu de Belles Artes, el de Vallaure, na menos que se-y apurren 8 millones. ¿Tien d’haber tanta diferencia nos recursos, de 167.000 euros a 8 millones…? ¿Cómo se valora eso? ¿Qué porcentaxe suponen los ciento y picu mil euros pa l’Academia sobre’l montu total de los 58 millones que remana Cultura?
Ya sé que los númberos son muy aburríos, pero son imprescindibles pa demostrar cómo, nin el mui asturianista señor Cascos, nin el so bon vasayu señor Vallaure, tienen el más mínimu interés pola llingua de los sos mayores. Porque coles perres que-y empobinen esti añu a la másima institución de la llingua asturiana, nun van poder desendolcase cuasi nenguna de les xornaes, congresos, estudios, publicaciones, Universidá de Branu, concursos, etc. qu’añalmente prestixen a l’Academia y suponen un gran encontu al llabor de recuperación y afitamientu d’una llingua en camín de la estinción (Unesco dixit) Poro, yo agradézo-y muncho al señor Conseyeru de Cultura que, de xemes en cuando, fale n’asturianu nel Parllamentu. Que s’aproveche agora, porque dientro poco nun va a haber llingua pa falar.
