La pequeña, pero activa, asociación cultural Ástura, entama los terceros martes de ca mes una conferencia nos llocales del Atenéu Obreru de Xixón. El tema siempres ye Asturies, en cualisquier estaya de que se trate, y procuren da-y un aire lo más científicu posible, dientro de l’amenidá. Asina, esti martes correspondió-yos al arqueólogu Ánxel Villa y al fotógrafu Juanjo Arrojo. El tema de la conferencia yera Túmulos y dólmenes, un ampliu percorríu pela primera arquiteutura monumental del Oeste de la Península Ibérica.
La esposición d’Ánxel Villa fue mui entretenida y la verdá ye que se nos fizo curtia, al tener que repartir el tiempu con Juanjo. Asina’l so percorríu partió del Quintu Mileniu, nel momentu en que les sociedaes primitives van faciéndose agrícoles y ganaderes, un estadiu superior al meramente cazador-recoleutor. Esos túmulos, n’Asturies un millar d’ellos reconocíos, ñacen nel occidente européu, y dan una información mui xusta del paleoambiente de la época, a traviés del analís de los elementos que componen la cubierta de los dólmenes. Esta arquiteutura monumental sirvía, nun solo como homenaxe a los muertos, cada vuelta más individualizaos, sinón tamién como marcadores territoriales. Víense dende lloñe y asina dábase anuncia de qu’esos terrenos taben ocupaos. Nun ye posible desendolcar equí’l conteníu de la conferencia, que llueu avanzó al traviés de los sieglos provocando unos cambeos que Villa desplicó axustadamente. Y asina, tres detenese en dalgunos de los más interesantes, diose pasu a Juanjo Arrojo, fotógrafu profesional, que fue mui allabáu por Amadéu Benavente nel so papel de presentador. Abaste dicir que tien cerque d’un millón de orixinales fotográficos, de toles estayes rellacionaes con Asturies: Monumentos, montañes, botánica, etc.
Juanjo proyeutó unes cuantes de les munches semeyes que tien, aparando principalmente nos asitiaos en Huelva (guapísimu’l Dolmen de Soto), en Mérida (destacando’l de Lácara) y dellos de los asturianos: Monte Deva, Monte Areo, el de Santa Cruz, en Cangues d’Onís, qu’entovía caltién dibuxos y color, y dalgunos más del occidente asturianu. Too ello dexónos un tastu mui prestosu y la verdá ye que quedamos con ganes de visitar -el qu’entovía nun lo ficiere- estos monumentos que siguen acoricando pa sí munchos misterios.
(Na semeya, vista parcial del Dolmen de la Santa Cruz)
