Abultóme mui estraño la poca asistencia qu’hubo ayeri nel teatru Xovellanos p’asistir al conciertu/recital de Schumann y Heine, dientro de les xornaes de la POEX25 de Xixón. Unes xornaes enllenes d’actos per cafés, llibreríes y salones d’actos, con xente, una más conocía y mas interesante qu’otra. Yo, la verdá, a munchos nun los sintiere nunca, pero eso ye más defeutu míu qu’otra cosa, pues igual ye que nun sigo la poesía tan cerca como debiere.
Pero, como digo, resultóme perestraño que nun marcu como’l teatru Xovellanos, y con un poeta como Heinrich Heine, nun se llenare a tope pa sentir el «Amor de poeta» de Schuman, cola lletra de «Intermezzo lírico» del escritor de Düsseldorf, nuna gran representación a cargu del tenor José Manuel Montero y el pianista Eduardo Frías. Dambos tuvieron magníficos. Tamién ayudó la torna al castellán de los poemes de don Heinrich, que podíen lleese al tiempu que les cantaba’l tenor. Asina esfrutábemos más los que nun dominamos l’alemán (que creo que yéremos cuasi toos).
Schumann musicó estos poemes depués de tener terminada la so composición «Amor de poeta». Un día, un poco por casualidá, cayó nes sos manes el poemariu de Heine y darréu percibió qu’aquello qu’escribía’l gran poeta románticu yera, cuasimente, lo que-y pasara a elli col gran amor de la so vida, Clara Wieck. Fía del so maestru Friedrich Wieck, conocióla con 13 añinos y yera yá una grandísima interprete de pianu. Más tarde fue tamién una importante compositora, yá col nome de Clara Schumann, anque quedare un poco a la solombra del so maríu. Pero pa consiguir la so mano (o seya, casase con ella), Robert tuvo que pelear col suegru que s’oponía a la rellación por considerar que’l compositor yera poco pa ella. La rellación pasó por munchos avatares hasta que trunfó l’amor. Dalgo asemeyao vien retratao nos versos de Heine, por eso Schumann los incorporó a la so obra, obra que fue la que sentimos esti día nel Xovellanos.
En fin, que llamento que los poetes y aficionaos qu’estos díes abeyaron per distintos llugares de Xixón en cata de bona poesía, nun recalaren nel teatru pa sentir con fondura la mecia d’estos dos fenómenos de la musica y de la poesía. Y gracies a la POEX25 por tan prestosa programación, en collaboración cola Sociedá Filarmónica de Xixón.
