Nun sé si vos pasará a vosotros pero yo tengo’l vezu de, cuando descubro a un autor desconocíu (desconocíu pa min, claro) y que me presta, xurgar n’otres obres que tenga publicaes pa siguir lleendo coses suyes, como calteniendo un filu narrativu con aquello qu’acabo lleer. Un de los exemplos ye’l d’Albert Sánchez Piñol del que, va poco, colgué nesti blogue un comentariu del so llibru «Las tinieblas del corazón».
Asina, fíceme con una novela antigua, del 2002, nuna edición en catalán y tornada llueu al castellán tres años depués. Como nun tengo facilidá pa lleer nel so idioma nativu, anque dalgo lleo, pasé direutamente al idioma de Cervantes (que ye un de los míos) depués d’enterame de que tuvo un gran ésitu la so publicación en dambes llingües.
«La piel fría» ye una novela estraña. Nun lo digo porque seya una historia de fantasía, que tamién, sinón porque trata estremaos temes al empar, pero ensin perder el filu argumental. Hai nella aventura, misteriu, terror… y una soterrada mirada a lo que ye «l’otru», el distintu. Ya inclusive el que nun parez tan distintu pero, na realidá, resulta que sí, que tamién lo ye.
El protagonista la historia ye un antiguu militante del IRA que, depués de lluchar polo que creyía que diba a ser una Irlanda llibre, democrática ya independiente, queda tan desengañáu col resultáu de tantos años de llucha, que pidi un puestu como oficial atmosféricu nuna islluca perdida metanes l’oceanu, pa ser releváu un añu más tarde. L’únicu compañeru que tien ye un estrañu fareru, foscu, raru y que nun quier saber nada d’elli. Pero, bien ceo, danse cuenta de que nun tienen más remediu que collaborar porque, de les agües negres del oceanu, surden unos seres anfibios que los asedien, los acorripien y los obliguen a permanecer tola nueche dientro del faru, onde se defenden coles armes que tienen, que son abondes, hasta que llega l’amanecerín. Y asina un y otru día, ensin lo que paeza un plan preconcebíu.
Con ellos, dientro del pequeñu isllote, convive un d’esos seres estraños, del xéneru femenín, que tien la cualidá de poseyer un altu grau de capacidá sexual y que xuega un importante papel nel desarrollu de l’aición.
La convivencia de los dos protagonistes, fondamente distintos, el papel del estrañu ser col que conviven y caltienen rellaciones, y los seres del oceanu que pretenden finar con ellos, entemécense perfaciendo un rellatu cuasi oníricu que t’atrapa dende les primeres páxines hasta un non menos estrañu ya inacabáu final. Y dientro d’ello, el comprobar qu’igual los seres distintos nun son tan distintos y que siempres pue haber una forma d’entendese hasta con aquellos que paecen ser los nuestros enemigos mortales.
Una novela que m’interesó muncho, abierta a numberoses llectures y escrita con una prosa firme y rotunda que te fai lleela como si lo que te cuenta pudiere tar pasando daveres. Porque la forma ye fantástica, pero’l fondu ye dafechamente humanu.
