Hai xente que nun ye quién a respetar les lleis obligatories (que pa eso son lleis), nin les normes sociales, nin los usos y costumes de los pueblos. Y entós anden perhí, ensin amu nin patria, como si too-yos diere igual. Al debalu. Y asina, esti día, ensin dase nengún «pistu», ensin emponderase nada nin bañase en golor de multitudes (¡¡pufff!) vinieron los Reis Magos y traxéronme un regalu. Yo nun creo nos Reis Magos, claro, pero, a lo que paez, ellos sí creen en mí. Y, poro, un día cualisquiera, como si fuere un 3 d’agostu o un 17 de payares, vinieron a veme y regaláronme un llibru. Ya vos punxe más ennriba como se llama.
Y, daveres, esti regalu tien forma de llibru, sí. Tien portada, y tien páxines y pue mercase nuna llibrería, pero «Angel González: poemas para mirar despacio» ye muncho más qu’un llibru. Un llibru lléeslu… y yá ta. Gustóme o non. Recordarélu un tiempu o pasará aína al desván de los llibros escaecíos. Pero esti regalu ye distintu: éntrate per tolos sentíos, porque están, sí, los guapísimos poemes del gran Ángel Gónzalez, pero llueu están los maraviosos dibuxos de Marina Buxó, d’una delicadeza qu’estremez, y que siguen al poema complementando’l so significáu, faciendo que t’entren nun sólo pol maxín, sinón tamién polos güeyos, pol gustu y cuasi pol olfatu (dacuando paecióme goler a salitre). Y arrodiando too ello, axustándolo too, como esi reló que Marina coloca nel poema «J.R.J.», está la mano invisible d’Ester Sánchez, diseñadora artística de Pintar-Pintar que ye la qu’edita esti averamientu poéticu a la figura del escritor ovetense. ¿Pa rapazos? Non señor: pa toos. Pa tolos que tengan la sensibilidá xusta pa esfrutar d’un productu artísticu, tengan nueve años o noventa.
El llibru vien prologáu por Susana Rivera, viuda del poeta, que comenta con un llinguax cenciellu y tamién poéticu, los primeros pasos del Ángel neñu al que la so hermana Maruja-y recitaba poemes. Y como un segundu prólogu, un perguapu acercamientu a la figura del autor, de la mano maestra de María Rosa Serdio que, amás ye la que fizo la escoyeta de los poemes, cosa que a min paezme d’un méritu descomanáu pues escoyer namás 12 poemes de tola obra del poeta ye llabor dificilísimu. Nun siendo un especialista na obra de González, como ye’l mio casu, abúltame que la escoyeta de Serdio axústase perbién al conocimientu del estilu (los estilos) del poeta y, p’enriba de too, trátase de dalgunos de los versos que meyor xueguen coles pallabres, cosa que los rapazos siempre agradecen, siendo mui afayadizos, amás, pa trabayalos en clase.
En fin, qu’agradezo a los Reis Magos esti regalazu en forma de llibru, anque agora intuyo que’l día 6 de xineru voi atopar los zapatos vacíos porque esta xente que nun tien chapeta, yá se sabe, vienen cuando quieren.
TRAS LA VENTANA, EL AMOR
Tras la ventana, el amor
vestido de blanco, mira.
Mira a la tarde, que gira
sus luces y su color.
La begonia sin olor
sus verdes hojas estira
para mirar lo que mira
tras la ventana, el amor:
la primavera, surgida
del pico de un ruiseñor.
