«Todo el silencio» (Colección de haikus) ye la cabera entrega de la escritora, y maestra (porque esa condición nun se pierde nunca) María Rosa Serdio, nuna modalidá poética que paez inventada pa ella: el haiku. Nun conozo a los maestros xaponeses del xéneru, nin a los continuadores del mesmu, yá d’otres llatitudes del anchu mundu, pero toi seguru de que María Rosa nun tien nada qu’envidiar a nengún d’ellos. Porque la concisión, la riqueza lléxica, el sentimientu y la señaldá son cuasi conxénitos a la poesía de la escritora llangreana. Nun-y fai falta, entós, averase a nengún modelu anterior masque pol cumplimientu, con una cierta llibertá, a los cánones estrenchos del xéneru. Lo demás, o seya, el conteníu del poema, surde por sí solu.
Esti últimu poemariu vien a ser, abúltame a min, como una continuación de la so obra anterior porque, amás, un xéneru que tien más de 12 sieglos de vida val más non tocalu pa facese «el novedosu». Lo que ye, ye. Y al que nun-y guste que cambie de xéneru. Asina pues, tenemos nesta nueva entrega «haikueña» (neoloxismu que ya-y ufierté a la RAE ensin que me contestaren entovía) rastros d’humanismu filosóficu, pese a la cenciellez del poema («Callan los pájaros/ y sigue el caminante/ sus pensamientos»), emponderación de la pallabra («Cada palabra/ recodo de un camino/ deconocido»), naturaleza muerta («Solo belleza./ El acebo no sabe/ del calendario») o naturaleza viva («Noche estrellada./ Solo los grillos saben/ cantar sus luces»). Y un mui guapu apartáu empobináu a la seronda, esa estación de la serenidá y de la señaldá: «Aún no es otoño», «Viene el otoño», «El otoño se anuncia», «En cada otoño» y entovía dalgunos más.
Hai, como ye llóxico, unos cuantos que gusten más al autor d’esti comentariu, o seya a min. Y suelen ser los que tan rellacionaos col llar, cola casa propia. Esos que destilen una especial morriña, como si les ausencies se anunciaren y el tiempu antiguu se detuviere: «Ya mediodía/ y la casa en silencio./ Aroma a lilas». O esi otru: «Entre paréntesis,/ un oasis de tiempo/ ¡Suena el reloj!». O aquel tan perfeutu na so cenciellez: «La madre lee./ Aroma de castañas/ en la cocina.» Una casa, amás, que ye dalgo más qu’una casa porque guarda l’alcordanza de los seres queríos: «Vuelve la luz./ La casa de los padres/ ¡Esa dulzura!».
En resume, un poemariu que se llee d’un tirón, pero qu’igual presta más dir lleendo pasín a pasu, abriéndo una fueya al debalu y dexándose sorprender por unes maraviyoses pallabres que te lleguen al corazón. Norabona a una autora que nunca defrauda.
