Aproveché la Feria del Llibru de Xixón pa facer unes poques compres, poques porque l’añu ta mui zorru, pero cola suerte de pillar, seguro, un de los llibros más guapos. Sé que va interpretase mal lo que pongo equí, nel blogue, porque les dos autores del llibrín son amigues, y de les bones, pero tampoco sedría xusto que, precisamente por ello, les dexara a un llau como si nun tuvieren el méritu d’asoleyar esta pequeña ayalga.
Porque eso ye «Colores y más colores», nuna edición conmemorativa qu’agora rescata el CEIP Elena Sánchez Tamargo de Pola Llaviana, onde una de les responsables del llibru maraviosamente editáu por Pintar-Pintar, María Rosa Serdio, fue profesora mui querida por los dos bandos (enseñantes y enseñaos) lo cuál nun siempre ye fácil de consiguir. Con unos pequeños testos poéticos, enllenos de sensibilidá y unos dibuxos que nun se cansa un de ver, Serdio y Ester Sánchez engranden el catálogu de la editorial hasta un cumal dificilmente superable. ¿Que soi esaxeráu? Bien, vamos facer una apuesta: si a dalgún de los compradores del llibru nun-y paez que ye verdá lo que digo toi dispuestu a paga-y el desembolsu. Pero, claro, ¡nun val engañar!
Dexando a un llau les bromes, un siéntese arguyosu de tener nes manes un productu asturianu de tanta calidá, dende’l puntu de vista lliterariu y tamién como productu bien ellaboráu que debería tar en toles biblioteques asturianes… y d’alluendi’l Payares. El llibru va, como ya se diz nel títulu, de colores. Práuticamente toos… menos el rosa, quiciás porque fue siempre’l color axudicáu a les muyeres. Yá sabéis, azul neños y rosa neñes. Pero equí non. Cada color vien precedíu por una especie de guapísimos bocetos de cuadros clásicos, onde apaecen Monet, Sorolla, Van Gogh, Manet, Juan Gris, Klimt y Dario de Regoyos, cuadros onde rescampla’l color escoyíu y que llueu abunda n’otra estampa yá imaxinada, formando un «dueto» cola anterior. Un trabayu’l d’Ester Sánchez de verdadera artista. Complementando les ilustraciones, unos pequeños testos de María Rosa Serdio que xueguen coles pallabres, coles repeticiones, coles metáfores: «Violeta del lirio/ violeta la flor/ violeta la tarde/ violeta el dolor». D’esti mou trescurre esti guapísimu llibru que da pena que termine. Recomendadísimu pa mirar con calma, pa enseñar a los neños y neñes, y pa guardar na biblioteca. Norabona grande a les autores.
