close
«Abel» d’Alessandro Baricco

«Abel» d’Alessandro Baricco

Sé que tien unos cuantos llibros más pero l’únicu que lleí del gran escritor turinés fue «Seda». Esa estraña novela d’amor que puede lleese como’l qu’amira un cuadru o contempla una escultura. Un llibru preciosu onde lo que menos importa ye l’argumentu (un comerciante francés que viaxa a Xapón a mercar gusanos de seda) y lo que más, la forma de cuntar les coses, les imáxenes visuales, la cadencia qu’enllena tol rellatu. Dalgo distinto, personal, propio.

«Abel» ye una novela de vaqueros. Un western. Y tien tolos elementos necesarios pa componer una novela de xéneru: Pistoleros, ganáu, caballos al galope, grandes espacios abiertos… Pero, como pasaba con «Seda», la historia nun ye lo importante. Y equí volvemos a lo personal de la escritura de Baricco, a la so orixinalidá. Porque nel fondu (y tamién na superficie) «Abel» ye una novela filosófica. Y fáesenos raro qu’un espertu en desenfundar les pistoles y executar «un místicu» (disparar coles dos armes al empar apuntando a dos oxetivos distintos) pueda llueu participar de visiones filósofiques de la vida. Pero asina ye. Y nun ye trayío polos pelos el que se fale d’Aristóteles, o de Descartes, o que se refugue la teoría de la causalidá que defendía David Hume. Porque, anque una causa produza un efeutu, y esto asoceda milenta vegaes, nun quier dicir que vaya asoceder «siempre». Eso, l’autor, demuéstranoslo a traviés d’un de los personaxes.

Nesi marcu, dacuando maxestuosu, dacuando terrible, que ye l’Oeste americanu, Alessandro Baricco ye capaz d’afinar el so estilu y dexanos unos cuantos capítulos, curtios, sensibles, emotivos, poéticos. Unos capítulos que podríen lleese independientes unos d’otros – anque hai un filu conductor- porque van p’atrás o p’alantre según los petites del autor. Asina que bien podríemos abrir el llibru por cualquier parte y ponenos a lleer, sacando placer inmediatu de la llectura. En fin, esta novelina curtia podra prestar más o prestar menos, pero tamos delantre d’un autor que fai lliteratura. Mui bona lliteratura. Y que, amás, arriesga frente al llector con argumentos orixinales que siempre ye d’agradecer. Paga la pena mercala y… lleela.