El 11 d’avientu de 1978, nuna aición de guerra en dalgún llugar de Nicaragua, resultó muertu un guerrilleru llamáu «Martín». Esi nome nun nos diz nada, pero sí nos lo diz si sabemos que la persona que lu llevaba llamábase Gaspar García Laviana. Tamien conocíu como’l «cura guerrilleru».
Ñacíu na Güeria de Carrocera (San Martín del Rei Aurelio) en 1941, fíu d’un mineru, Gaspar estudió Teoloxía y fízose sacerdote diciendo la so primer misa en 1966 en Tuilla. Poco depués treslladose a Madrid onde trabayó como cura-obreru en distintos oficios. Cuando la orde a la que pertenecía pidió voluntarios pa dir a Nicaragua apuntóse’l primeru siendo destináu a la parroquia de San Xuan del Sur. Hasta equí, unos pocos datos de la so biografía.
Tenemos nes nuestres manes un llibru editáu de recién pola Academia de la Llingua Asturiana que lleva por títulu «Cantares d’amor y guerra», firmáu por esti home, esti cura asturianu y, más tarde guerrilleru sandinista, que respuende al nome de Gaspar García Laviana. Son, si non los conté mal, 53 poemes d’estremada temática y llargor. La torna al asturianu cuerre a cargu de Lourdes Álvarez. Y el llibru cuenta tamién con un mui interesante prólogu firmáu por Ernesto Cardenal, el que fue primer ministru de Cultura del Gobiernu Sandinista, tamién sacerdote y poeta y al que, recordemos, humilló’l papa Juan Pablo II negándo-y el saludu y la bendición poles sos idées d’izquierdes cuando visitó Nicaragua. Yá sabemos lo facha que yera’l polacu.
Nel prólogu, Ernesto Cardenal da munches de les claves que llevaron a García Laviana a afiliase a la guerrilla y fai un estudiu, mui sele, de los poemes que s’incluin nel llibru. Depués d’una llectura atenta somos a coincidir col prologuista en que son unos poemes d’amor (al campesín, a les probes prostitutes a les que tanto defendió, al paisaxe que lu vio morrer) y, al tiempu, son tamién unos poemes que rezumen ira, roxura, y, si nun fuera cristianu, podríemos amestar «odiu». Odiu al personaxe encarnáu por Somoza (al qu’intentó matar con una bomba) y a los terratenientes qu’esplotaben a los más probes y a les muyeres que llegaron a prostituyir.
Dende’l puntu de vista lliterariu trátase d’unes composiciones percencielles, escrites con un aquel pedagóxicu, de denuncia, y pa que los campesinos a los que diben empobinaes supieren que taba de la so parte, qu’ellos teníen razón y que taba dispuestu a lluchar hasta la muerte por defendelos, como asina fizo pocu tiempu depués. Hai dalgún un poco más trabayáu, más lliterariu, pero los más, asoleyen esi cantu solidariu a aquellos home y muyeres a los que nun pudo ayudar cola sotana, pero que sí lo fizo col fusil, pues el so exemplu engrandó y xustificó a los que llueu se sumaron a la llucha escontra’l dictador y el so réxime corruptu. Esi ye’l puntu de vista dende’l que yo entiendo’l poemariu, porque siempres ye un bon momentu pa posicionase escontra la tiranía y la corrupción. Siempres, llamentablemente, presentes.
Cantu I
Cantaría pa ti,
campesín,
una añada
como se canta a los neños.
El mio cantar ye un deliriu:
el mio cantar
yes tu mesmu.
El mio cantar ye la verdá,
el mio cantar ye’l to destín;
yo cántote la victoria
y la guerra ye’l camín.
