Louise Penny ye una escritora canadiense mui prolífica, profesión qu’exerce depués de pasar pol periodismu escritu y radiofónicu, y na cual ta yá centrada dende va una montonera d’años. Na so mocedá tuvo problemes col alcohol, según cuenten los biógrafos y, quiciás como compensación, calumbóse dafechu na escritura con mui bona fortuna. Anque tien otros llibros diversos, lo que-y dio la fama (y los premios) fue la serie de noveles policiaques protagonizaes pol Inspector Armand Gamache (paezme que son trece), que vive nun pueblín de Quebec llamáu Three Pines, nel que toos se conocen y s’aprecien, pero que nun quita pa que tamién pasen coses abegoses yá inclusive criminales.
«Casas de cristal» ye una novela de fondu caláu y gran trabayu psicolóxicu, enllena de recovecos y, non yá sorpreses, pero sí averiguaciones dacuando sorpresives. Un día apaez nel pueblu un personaxe tou vestíu de negro, mazcaráu, que se llanta nel parque central xunto a un árbol y permanez ellí quietu, día y nueche, llevantando mieos y sospeches en tol vecindariu. D’ellí nun pueden echalu pues nun ta faciendo nada prohibío, anque toos la paguen col Inspector por nun facer nada. Polo qu’ésti adivina, paez representar a un personaxe antiguu que llamaben «el cobrador» que siguía a aquella persona que ficiere dalguná maldá, como recordatoriu delantre la xente. Una especie del «cobrador del frac», pero nesti casu non por deudes monetaries, sinón morales. Una especie de voz de la conciencia. Un personaxe datáu yá nel sieglu XIII a traviés d’una historia mui guapa qu’aporta hasta los nuestros díes.
Pero Gamache nun puede dedica-y munchu tiempu a la especulación d’esi ser llegáu d’otra dómina, porque los cárteles de la droga azoten, como una tormenta, tola rexón ante la impotencia de la Sûreté de Quebec que ta embaxo’l so mandu. Y precisamente ye’l so pueblu, Three Pines, un llugar apegáu a la frontera con Estaos Xuníos, peronde pasen los mayores alixos de drogues. Munchos problemes pa tan poca xente.
Por embargu, la novela de Penny ye muncho más qu’una historia de tantes sobre la policía y los narcotraficantes. Equí plantéense verdaderos problemes morales, y vese tamién lo delgada que ye la llinia que separta la llei y la conciencia, y la respuesta que caún tien de dar en cada momentu que se plantega. Poro, quiciás nun toos nos pondríemos d’alcuerdu coles decisiones que va tomando l’Inspector Gamache, tal y como tamién pasa na novela.
Un llibru densu, complexu, pero d’esos que te presta dir lleendo y desendolcando los misterios al empar que lo va faciendo’l protagonista, cola collaboración d’un piñu de personaxes, la muyer, los amigos, los ayudantes del departamentu… toos ellos perbién definidos, que dan un arropu humanu (y lliterariu) al personaxe central. Munches histories dientro d’una historia y toes elles interesantes. Recomendada.