Ya comenté, va un tiempu, la presentación de la esposición que col títulu «Con alma de papel», presentare’l polifacéticu Paco Abril na sala «El arte de lo imposible«, de Xixón. Pues bien, a resultes del ésitu artísticu y de públicu que tuvo, l’autor animóse a publicar, nun pequeñu llibrín de perguapu diseñu, una parte d’aquellos collages, ente poéticos, humorísticos ya inquietantes. Xunto con ellos, acompañándolos que non desplicándolos porque nun quieren desplicación, unos pequeños escritos, a mou de sentencies filosófiques, que complementen los dibuxos zarrando una especie de círculu artísticu.
Resulta curiosu hasta’l mou en que Paco quixo publicar el llibru: con un novedosu métodu de «pequeños mecenazgos» nos que, con una modesta aportación previa, podíes collaborar a la publicación de la obra asegurándote un exemplar dafechamente personalizáu. Claro ye qu’un servidor fue un d’esos pequeños mecenes y, poro, agora tengo enriba la mio mesa de trabayu una guapísima llibretina, en tonos negro y plata, que de xemes en cuando abro y relleo.
Tolos que naguamos pola llectura, y muncho más a los que nos presta escribir, tenemos, en dalguna midida, un «alma de
papel». Por más qu’agora haya llibros dixitales, munchos siguimos escoyendo esi oxetu maraviosu al que nos gusta tocar, goler, cuasi tastiar. Paco Abril tien, por ello, un «alma de papel». Pero si atalantamos, como yo atalanto, que l’alma nun ye daqué esclusivamente relixoso, sinón too aquello que nos separta de la «animalidá» y de la «cosificación», esi «álitu» que nos enllena y nos fai ser como somos, l’alma de muncha xente, como por exemplu la de Paco Abril, nun ye solamente de papel. Ye tamién un alma d’illusión, de trabayu, de constancia, d’ amistá. Too eso compón l’ «ánima» de Paco y, por too ello, dende esti modestu blogue vuelvo a felicitalu y animalu p’aniciar nuevos ya illusionantes proyeutos como ésti. Qu’asina seya.
De entre
sus manos
surgió,
a flor de piel,
su fragil
alma de papel.
