Na primavera pasada, comentóme María Xosé, la entós responsable de la Oficina Municipal de la Llingua de Xixón, que taben faciendo una esposición con tola mio obra infantil y xuvenil pa pasala polos distintos colexos de la ciudá. Nun sé si llegué a falar d’ello nesti blogue. Llueu María Xosé pasó pa otru departamentu (¡un besu dende equí!) y la cosa perdió dalgo de puxu. En cualquier casu, la idea salió p’alantre y estes últimes selmanes tuvo espuesta nel colexu «El Lloréu» del Natahoyo.
Esti día llamóme del colexu la inquieta y perbona escritora Iris Díaz Trancho, que ye la maestra d’asturianu, pa dir a
zarrar el periodu de la esposición, diendo a falar colos neños de clas. Pa ellí fui. Los pequeños teníen lleío «La bruxa Pumarina y el dragón Maragatu», los medianos «Les aventures de Xicu y Ventolín», y los más mayores, creo que de sesto, ficiéronlo con «El Club Social d’Altos vuelos». Tres una pequeña presentación per parte de la «profe», y una curtia intervención mía, garraron la pallabra los neños y neñes que m’acribillaron a entrugues sobre los llibros, la escritura y la mio persona. Como siempre, porque un yá ta avezáu a estos alcuentros, les entrugues húboles de toa frasca: intelixentes, curioses y… «de pata bancu». Una mui simpática fue: «Y tú dende que sales de casa yá tas firmando autógrafos». ¡Probe! Debía creyer que los escritores somos como los futbolistes. Otru dixo que-y prestaba muncho la Educación Física, pero que prefería tar tol día escuchando a Vicente García Oliva. ¡Nun sabía a lo que s’esponía! En fin, tamién les hubo series, y dalguna moza amosó’l so interés por llegar a ser escritora, motivu d’un llargu alderique.
Nun voi recurrir a esi tópicu de «la soledá del escritor» mientres construi la so obra, o’l «síndrome de la páxina en blanco», que me paecen simpleces, pero lo que si ye verdá ye que, dacuando, ye mui refrescante enfrentate colos llectores a los que va empobinada la to obra. Ellos fáente «tomar tierra» y tener un xuiciu imparcial de lo qu’escribes. Gústes-yos, o nun-yos gustes. Van dicítelo con toa naturalidá. Como tien que ser.
Nota.- Na semeya de la mandrecha, un mural que ficieron lo rapazos/es de sesto, con toles especies de páxaros que salen n’ «El Club Social d’Altos Vuelos», con un QR pol que pases el móvil y salte la información sobre elli. Ablucante.
