Don Pedro Calderón de la Barca (1600-1681) nun necesita nenguna presentación, pues anque namás fuere poles veces que nos lu recitaron nel Bachiller (el d’antes, claro), ya nos quedó llantáu nel maxín xunto con otros notables colegues de la Edá d’Oru española: Lope, Quevedo, Góngora… Cítense muncho, pero lléense poco, esa ye la verdá. Porque, anque ye cierto que depués de 400 años les coses nun son iguales (por suerte, creo), sí ye verdá que les grandes pasiones y los grandes sentimientos humanos siguen tando ehí, como nel aniciu los tiempos: l’amor, l’odiu, la envidia, l’egoismu, la calumnia… Dizse siempre (polo menos dígolo yo) que Shakespeare sigui vivu, anque agora vivamos en grandes ciudaes y viaxemos en coches llétricos. Pero abasta con rascar un migayín na capa de «civilidá», pa qu’apaezan eses grandes pasiones. Eternes, porque son les propies de la condición humana, del ser humanu.
Esti día poníen nel Teatru Xovellanos de Xixón la obra calderoniana «El gran teatro del mundo» y la muyer y yo pensamos invitar a vela a la nuestra nieta mayor (14 años mui bien aprovechaos), pa que tomare contautu colos clásicos españoles. Ye una edá mui guapa pa empezar a pasar del llibru a la realidá. Anque pudiere aburrise un poco. La verdá ye que nun fue asina.
La «culpa» d’ello (de que nun s’aburriere) fue la puesta n’escena d’una gran compañía. Na menos que la Compañía Nacional de Teatro Clásico, dirixida por Lluis Homar, y con una decena d’actores nel escenariu. La obra nun ye de lo más interesante del autor madrilanu (El alcalde de Zalamea, La dama duende, El médico de su honra, La vida es sueño…), porque se trata d’un «auto sacramental», o seya una obra de calter relixosu pa representar nel día del Corpus. Pese a ello, nel Gran Teatru… hai munches de les obsesiones de don Pedro al rodiu de la brevedá de la vida y de cómo nun valen pa nada tolos honores y riqueces que podamos algamar nesti mundu, porque too ello va a llevánoslo la muerte y el destín que tengamos asignáu.
Nesta obra, ye’l propiu Dios el que baxa a la tierra, como de «tournée» (al igual que na obra de Jardiel Poncela) y fala col Mundu, representáu por una muyer, pa que prepare a los humanos porque va a da-yos el papel que tienen qu’interpretar na so vida. Los humanos nun tienen tovía esi atributu, el de la humanidá, porque necesiten el papel que van tener que representar y, poro, unos protesten porque-yos toca’l de probes, o campesinos, mentanto otros tán encantaos porque van ser reyes o ricos y folgaos. Pero, claro, al final van tener que responder del so pasu pela tierra y lo bien, o mal, que representaron el personaxe axudicáu.
Too nel montaxe de la obra funciona bien. Dende’l propiu papel de Dios, que nun ye’l paisanín esi vieyu que nos mira dende’l cielu/firmamentu, sinón un personaxe un poco híbridu, mecia d’home y muyer, pues tien la parte d’abaxo con faldes y tacos, y la d’enriba de paisano, colo que-y da un aquello d’ambigüedá. Los actores cumplen perfeutamente los papeles, con una voz y una dicción que nosotros, que tábemos atrás del too, nun perdimos nin un rispiu del testu. La sobriedá del escenariu y la iluminación mui acordies colo que se representaba. En fin, que marchamos mui contentos y fuimos a tresmiti-y a la nuestra nieta, sinón l’amor, si l’interés por unos autores de va 400 años pero qu’entovía tienen muncho que nos contar. Un aciertu.
