Tuvo mala suerte l’arxentín Jorge Fernández Díaz de llamase como aquel infaustu ministru de Rajoy, beatu, tramposu y facha pues igual dalguién pudiere confundilu con elli. Por suerte nun tienen nada que ver. A la escontra, esti otru Jorge ye un escritor que vien de ser reconocíu col famosu Premiu Nadal pola novela «El secreto de Marcial» y, polo que nella cuenta, paez ser una bona persona.
Acabo, recién, de lleela y tengo de dicir que me prestó, ensin tratase tampoco d’una obra esceicional. Ye más, diría que pa esfrutar dafechu d’ella fain falta dos coses: ser asturianu y ser un namoráu del cine clásicu. Porque, anque l’autor ñació en Buenos Aires (1960), ye fíu y nietu d’asturianos y a lo llargo tola novela fai gala d’ello. Anque dalgunos críticos falen de que ye una novela que cuenta una historia d’emigrantes españoles n’Arxentina, eso nun ye verdá. La historia que se cuenta ye la d’unos asturianos n’Arxentina. Nunca, en nenguna de les páxines, l’autor reconozse como español, sinón siempre como asturianu. Y toles referencies familiares, culturales y xeográfiques cinquen a la so patria, Asturies. Nun sólo eso, sinón que’n dellos pasaxes de la obra comenta que falaben «bable» en casa y cómo eso-y traxo dificultaes de comunicación col restu los compañeros d’escuela. El llugar onde se desendolca la mayor parte l’aición ye al rodiu del Centru Asturianu y la música que siente cuando ta triste ye la gaita. Un verdaderu bañu d’asturianía. Y si dalguién tien entovía duldes namás hai que lleer la entrevista que-y faen na revista XLSemanal. La entrevistadora fála-y de los munchos españoles qu’hubo n’aquel país y el contesta-y que yera l’unicu arxentinu de la familia: «Ahora me siento un espíritu anfibio, a la vez argentino y asturiano». Non español, sinón asturianu.
La otra pata que completa l’argumentu la novela son les constantes referencies al cine clásicu. El protagonista nun ye quién a comunicase con so padre, un individuu secu y oriscu, a nun ser cuando tán xuntos viendo los programes de cine de la tele. Y eses películes van ser l’únicu vínculu al que garrase pa nun perder tou contautu sentimental. Tien de ser depués de la muerte de Marcial cuando’l fíu trata de recomponer el puzzle de la vida de so padre, na que siempre consideró qu’había un secretu que se-y escapaba. Al tiempu, vamos enterándonos de la so propia vida como periodista de socesos y escritor, y viviendo fechos importantes d’Arxentina, como la Guerra de les Malvines. Una novela entretenida -embaxo eses dos premises- bien construyida y que se llee con gustu porque tal paez que tamos viviéndola como si fuéremos parte la familia. Como exemplu, la historia principia asina:
«Cuando Marcial contó la extraña aparición de Lucrecia López en el lago Regatas, mi madre dejó caer con un escalofrío la palabra «güercu».
¿Suena a conocío, non? Pues perhí, p’alantre. ¡Qué vos preste!
