La vida de Bonnie Jo Campbell, autora del llibru «Érase un rio», ye un poco como la d’un de los sos personaxes: solitaria, selvaxe, campesina… Percorrió Norteamérica faciendo autoestop, vendió granizados pa un circu ambulante, xubió Los Alpes en bicicleta y entamó viaxes d’aventura per Europa… y dexó un par de noveles y un piñu de guapos cuentos nos qu’espeyaba esa vida rural de l’América fonda.
Vi n’escaparate d’una importante llibrería de Xixón, empobinada al públicu infantil/xuvenil, la novela «Érase un rio» y con esi espíritu principié a lleela. Nel intre descubrí que nun ye, pa nada, una novela pa esi públicu. Y ye que persiste esa zuna de qu’una novela protagonizada por una mocina n’edá adolescente ye lliteratura xuvenil, y nun tien por qué ser asina. Talo qu’hai munches noveles xuveniles protagonizaes por adultos y nos que nun sal, porque nun tien por qué salir, nengún rapaz o rapaza, y sí lo son.
Margo Crane ye una mocina de 16 años que vive con so padre y nel entornu d’otros familiares. So ma abandonólos va tiempu, ensin dar dala esplicación, y a la muerte del so proxenitor y tres un incidente desafortunáu con un tíu suyu, marcha de casa en busca del so horizonte queríu: el ríu. Ellí se crió ella y conozlu bien, pero’l ríu ye mui llargu y n’elli habiten toa clas de personaxes… y nun toos son buenos. Asina, cola compaña d’una escopeta Marlin, unos víveres y una biografía del so personaxe favoritu, Annie Oakley, que participó con Buffalo Bill nel mundu asonsañáu del Oeste, remonta’l Stark en cata de so madre. A lo llargo del percorríu atópase con tou tipu de persones, la mayoría que quieren aprovechase d’ella, pero Margo ye más adulta de lo que paez y namás cede cuando quier ceder.
Novela selvaxe, como la so protagonista, una especie de neña/lloba, que fala poco pero que remana la escopeta con maestría y nagua por vivir sola y al debalu, anque dacuando sienta la necesidá de compaña. Pero sólo la qu’ella quiera. Una narrativa cenciella, cuasi ensucha pero enllena de poesía y amor a la ñatura, fai d’esti llibru una llectura perguapa anque de nengún mou afayadiza pa llectores non formaos. Nada que ver con dellos otros títulos, dalgunos de los cualos comenté recientemente. Un final sensible y poéticu zarra esta novela que ye un títulu mui recomendable. Esa ye la impresión que me dexó.
