Títulu: Sin aliento
Autora: Ilsa J. Bick
Torna: Nua Velascoso
Editorial: Círculo de lectores
Añu: 2012
UNA GUAPA Y DURA NOVELA XUVENIL.- El mundu de la lliteratura xuvenil, que sigui siendo’l gran desconocíu de la crítica y del públicu llector (anque llueu vayan a ver les películes que faen los americanos, siempre mui por baxo de la novela correspondiente) ufierta, de xemes en cuando, dalguna ayalguina como ésta que comentamos equí y que merecería ser lleída tamién pol públicu adultu. Siempre dixi qu’hai una estaya ehí, ente l’adolescencia y la maurez, en que les noveles puen ser fácilmente intercamudables, pero pocos adultos quieren acercase a un mundu tan prósimu y tan alloñáu como ye’l d’esa edá ente los 14 y los 17 años, anque llueu quéxense de nun entender a los sos fíos o nietos.
Ilsa J. Bick ye una persona bayurosa en conocimientos. Forense, psiquiatra infantil y hasta Comandante nes Fuerces Aérees de los EE.XX, graduóse llueu en Lliteratura y Estudios Cinematográficos pa empobinase, ya dende entós, dafechamente a escribir llibros. Sin aliento ye la primer novela que yo lleo d’ella pero, de xuro, nun va ser la última.
Jenna ye una mocina de 16 años a la qu’acaben de rescatar d’un llagu xeláu en Wisconsin, al norte de los Estaos 
Xuníos. Por qué y cómo llegó ellí ye lo que nos cuenta la novela de Ilsa Bick. Jenna fala a una grabadora que-y dexó’l policía que la rescató, y asina, en primer persona, conocemos a la so familia, un padre mélicu que s’acuesta con toles moces que se ponen a tiru, una madre medio alcoholica que dirixe una llibrería famosa… y sabemos tamién por qué ella pasó un tiempu nun siquiátricu y por qué tien esi afán n’autolesionase. Hasta qu’un día conoz al que paez que va a ser el so salvador: el profesor de Química, señor Anderson, verdaderu ánxel de la guarda… ¿o non tanto?
Con un llinguaxe cenciellu y convincente, mui axustáu a la edá de la mocina, l’autora va rellatándonos en capitulinos curtios ya intensos la historia de Jenna y dexándonos al descubiertu les sos zunes y sentimientos. Una persona con gana d’amistá fonda, d’amor, de dalguién que cuide un poco d’ella. Pero too al so alredor ye movedizo y cuando camienta garrase a dalgo sólido, eso tamién se bancia. Asina, cada páxina paez enzarrar un misteriu y fai que’l llector llea la novela con un ciertu desasosiegu. Una novela, en fin, mui prestosa y que, amás, faete pensar y conocer un poco meyor esi ricu mundu de la mocedá.
