Títulu: “La lista”
Autor: Frederick Forsyth
Editorial: Plaza & Janés editores
Torna: Luis Murillo Fort
Añu: 2013
UN CHACAL DEL SIGLU XXI.- L’escritor británicu Frederick Forsyth (Ashford, 1938) ye l’autor d’una prestosa novela –Chacal- que data de primeros de los años setenta del sieglu pasáu, onde se relata l’intentu d’atentáu escontra’l xeneral De Gaulle, mandatariu francés, por aciu del grupu de militares terroristes de la OAS. Pente medies la llucha, interna y esterna, de políticos y militares al rodiu de la independencia d’Arxelia, nos momentos en que trescurre l’aición una colonia francesa. La novela, mui prestosa, dio pasu a una interesante película de Fred Zinneman con Edward Fox nel papel principal, y a un horrorosu remake, col insípidu Bruce Willis faciendo de “mocín”.
L’estilu d’aquella novela yera lo que suel llamase “periodísticu”, quier dicise cuasi en forma de crónica y onde lo importante ye l’aición, lo que pasa y lo que pue pasar, y menos les interioridaes de los personaxes, descritos con unes poques pincelaes qu’abasten pa identificalos frente a los sos enemigos. Xunto a ello, munchos datos téunicos, xeográficos ya inclusive políticos qu’enmarquen los socesos y dan mayor credibilidá a lo que se nos cunta.
Esi ye’l métodu que’l veteranu Forsyth vuelve a emplegar en “La lista”, la so última y reciente novela, onde repite formatu pa cuntanos una historia de muncha actualidá. La “lista” de la que l’autor británicu nos fala ye una que ta en poder de determinaos servicios secretos norteamericanos y tamién del propiu presidente de los Estaos Xuníos, onde figuren los que, al so xuiciu, son los principales enemigos del País. Una llista d’oxetivos humanos pa ser eliminaos del mou que fuere, y equí hai qu’atalantar físicamente. Con ellos nun hai detención, xuiciu nin encarcelamientu: derechamente son persones a esaniciar de la faz de la tierra. L’oxetivu en concreto qu’hai qu’eliminar nesta novela ye un fanáticu islamista conocíu como’l «Predicador» que, a traviés d’internet, va comenciendo a individuos de procedencia árabe pa que faigan atentaos en EE.XX y en Gran Bretaña. Ye un home perllistu y al que paez imposible llocalizar y, muncho menos eliminar.
La historia tien un protagonista, na figura d’un militar espertu n’espionaxe -el Rastreador-, con carta blanca pa pidir collaboración
a los servicios secretos de mediu mundu, ente ellos los ingleses y los israelíes que son los que más trabayen. Asina, el llector va conociendo les interioridaes de tolos grupos d’operaciones especiales occidentales, les trampes que faen y les lleis, propies y ayenes, qu’incumplen. Conoz tamién la falta d’escrúpulos de toos estos espíes, les armes qu’empleguen (ente elles los famosos «drones»)y el mou nel que trabayen. L’argumentu encaxa como les pieces d’un reló y la tensión va engrandando a midida que s’allega’l final. Ye una llectura, pues, interesante ya informativa, con dalgunos momentos realmente mui bien consiguíos, talo que si el propiu autor pasare por ellos, como por exemplu cuando se narren los preparativos y la execución d’un de los comandos ingleses nomaos pathfinder, dafechamente entrenaos p’ataques por sorpresa.
Frederik Forsyth sigue, pues, fiel al estilu que-y dio xusta fama, con esta novela que nun defraudará a los sos munchos siguidores. A min tampoco.
