Facía tiempu que nun esfrutaba tanto lleendo una novela negra. «Hierro viejo», de Marto Pariente, ye una historia curtia y cenciella. Escrita, amás, ensin nengún interés por eses descripciones seudorromántiques de puestes de sol, carreteres solitaries y grandes praderíes onde pastia un ganáu aburríu, porque «Hierro viejo» ye un western d’esos que llamen «crepuscular». En realidá de crepuscular sólo tien al protagonista, porque lo demás podría tar pasando agora mesmo en cualquier país latinoamericanu, o na propia España vaciada.
Coveiro, el vieyu protagonista, fue nel so tiempu un asesín a sueldu. Del meyor postor, que suel dicise nestos casos. Pero agora yá la vista nun-y respuende como debiere y la próstata tienlu mexando poco y mal, lo que-y produz una malura que lu trai fritu. Nun ta pa munchos trotes, dicho en tolos sentíos de la pallabra. Poro y por otros motivos que s’espliquen na novela, aceutó’l puestu de sepultureru del pequeñu pueblu de Balanegra. Ellí vive con un rapaz autista y estrañu que ye fíu d’un queríu hermanu que morrió. Un día les coses complíquense por mor d’un grupu mafiosu, de munchu poder y pocos escrúpulos, y el rapaz esapaez. Coveiro va a la busca y nel camín, acompañáu de la recortada que se fabrica porque yá nun ve pa tirar con pistola, va dexando un regueru de muertos que lu minusvaloraron por creyer que yera un inútil. Un erru que pagaron mui caru. La prosa de Pariente ye tamién como un disparu: seca y mortal. Con una mínima espresión lliteraria, pero con una precisión milimétrica, l’autor va presentándonos a un piñu de personaxes perfeutamente diseñaos que desfilen pola novela hacia un final que ye, al tiempu, grande y pequeñu. Nun puedo destapecer más coses. Eso sí, que naide espere por comportamientos morales o personaxes éticos. Les coses nun van perehí. Equí nun hai modelos a imitar. Pasa como na vida real: nun siempre los malos paguen los sos pecaos.
Hai esi tópicu que diz de dalgunes noveles que nun se puen dexar de lleer. Bien, nesti casu’l tópicu fizose realidá, finéla nun tiempu record. Seguro que a vosotros pásavos igual. Facéi la preba.
