Juan Gómez-Jurado ye un paisanu simpáticu, bon comunicador, que lleva yá un tiempu asentáu na prensa y na lliteratura nun solo españoles sinón, como presume la editorial, n’otros dellos paises pues los sos llibros tán tornaos a «más de 40 lenguas». Anque la so obra ye abondosa, destaquen unos títulos mui sonoros que son dalgo asina como «Reina roja», «Loba negra» y «Rey blanco», anque igual mezclo los colores. Yo lleí, enantes de les de los colores, una aceptable novela suya titulada «Cicatriz» que reseñé nesti blogue y que podéis lleer (la reseña, non la novela) nel buscador de Trabayu de Campu.
La cabera historia qu’asoleya l’escritor madrilanu ye esta «Mentira» que tien tola pinta de que, como les sos hermanes, va a convertise nun ésitu editorial y, cuasi seguro, nuna serie de televisión. Yo principié a lleela ensin saber nada d’ella y la primer sorpresa que tuvi fue que l’aición desarróllase n’Asturies: Xixón, Uviéu y, sobre too, Somiedu, patria piquiñina del gran Álvaro Florez Estrada del que, por cierto, nun se diz nada.
Nesta clas de noveles, vamos llamar «noir» pa nun mezclar más colores a les que yá tien publicaes, ye mui difícil cuntar l’argumentu ensin descubrir coses importantes que’l llector nun tien de saber. Lo del espoiler y too eso. Y nesta historia hai unes cuantes d’eses coses que nun pueden adelantase. Sí podemos dicir que la mocina, Eva Ramos, ye una persona que trabaya pa un misteriosu paisanu que-y encarga determinaes actuaciones, cuasi siempre ilícites, pa lo que tien que cambiar davezu de nome y de profesión. O seya, que tien que tar siempre «contando mentires», y d’ehí el títulu de la novela. La mocina debe obedecelu porque nel so poder tien una melecina que necesita’l so hermanu, que carez una enfermedá de les llamaes «rares» y qu’ella nun podría costear. Nuna d’eses misiones tien d’intermediar ente dos bandes mafioses, col resultáu de que les dos bandes terminen persiguiéndola pa matala. Nun lo fizo mui bien. Pa escapar, Eva tira pal puertu de Somiedu que ta zarráu pola nieve, y ellí tres un accidente col coche, queda anculta nel pueblu faciéndose pasar por dalguién que nun ye. Otra mentira. Y ye nel pueblu, zarráu per una tormentona que dura dellos díes, onde Eva tendrá qu’emplegar tolos sos esfuerzos y esperiencia pa descubrir a un asesín que campa peles vieyes caleyes y les cases aprobetayaes, en cata de descubrir un misteriu qu’endolca a Somiedu dende tiempos ensin memoria.
Asina, la novela pasa d’una especie de «serie B», con tiros, persecuciones y mui poques esplicaciones, a una especie de novela d’Agatha Christie que recuerda un poco a la de «Diez negritos», o como coime se llame agora con eso de lo políticamente correuto. L’aición ralentízase y pasamos a los estudios sicolóxicos onde toos pueden ser los asesinos. En fin, una novelina qu’entretién pero a la qu’habrá que quitar toos esos descomanaos eloxos de los corifeos de turnu, pa los que seguro que será la meyor novela del mundu. A min fízoseme un pocoñín pesada, porque’l señor Gómez-Jurado tampoco nun ye Ágatha Christie.
