close
La Selmana de les Lletres: ente la ciudá sí, y la ciudá non.

La Selmana de les Lletres: ente la ciudá sí, y la ciudá non.

2015-05-11466Visitas

Iris presentandoTraigo equí’l títulu del guapu poema de Evtuchenko pa comentar delles coses, de la finiquitada Selmana de les Lletres, unes que me prestaron y otres que non. Principiando poles «de la ciudá sí», prestóme muncho la presentación del llibru Capsules de tiempu, de Carlos González Espina (el llibru entá nun lu lleí) y la intervención sobresaliente que tuvo Iris Díaz Trancho. Yo cuando seya mayor quiero escribir como ella. Tamién Carlos tuvo bien. Fue mui llucida la llectura del Quixote, na versión de Pablo Suárez, nel marcu afayaízu del Paraninfu de la Universidá, como yá comenté n’otra entrada. Con tou merecimientu, la Xunta pola Defensa de la Llingua tuvo un reconocimientu de l’Academia pol llabor fechu a la llargo toos estos años. Pulgar lleó un escritu enllenu de fuercia y reivindicación. Tamién el discursu de la Presidenta de la institución me prestó. Tuvo puxu y claridá reilvindicativa, pues tou él refirióse al oxetivu de la oficialidá, encamentando a los partíos que se presenten por Asturies a llevala ente los sos oxetivos: va a vaganos. Y tamién me prestó ver perellí y saludar a vieyos amigos, d’esos que namás atopes n’actos d’esta mena. Por cierto, saludé y felicité a Ángeles Carbajal, que me punxo una dedicatoria mui guapa nel so llibru L’aire ente la rama, ganador del premiu Acebal de poesía. Otru día falaré d’él.

Pero «la ciudá non» taba mui enllena de coses negatives. La primera «la Sanjurjada», esa desafortunadísima intervención delPedro Sanjurjo Presidente de tolos asturianos -o seya, el del Parllamentu- poniéndose públicamente a la escontra de la Oficialidá. A min nun m’interesa la so opinión personal, nin siquier la del so partíu socialista que tantu dañu ta faciendo nesti tema. Pero cuando ta desendolcando un cargu nel que representa a tolos asturianos, nun pue ofender a nengún, y les sos opiniones tien que meteles… onde-y quepan. Mui mal, pal aldeanín esi d’Abres que refuga de la llingua de los sos mayores, precisamente na selmana en que más habia que la ensalzar. Al actu de l’Academia del Día de les Lletres Asturianes, acudieron tres candidatos a gobernar Asturies: Cristina Coto, de Foro; Gaspar Llamazares, de I.X.; y Nicanor García, de Ciudadanos. Notóse, en cambiu, l’ausencia de Merceditas Fernández, del PP; d’Emilio León, de Podemos; y l’ínclitu Javier Fernández, del Psoe. Teníen coses más importantes que facer. Los de Podemos, por exemplu, una concentración nel Nauticu de Xixón, xusto a la mesma hora que l’actu de l’Academia. ¿Nun tendríen otru momentu meyor? Porque’l Día de les Lletres ye namás una vez al añu… En fin, ca vuelta se me quiten más les ganes de votalos. Y yá, pa nun aburrir, destacar una vegada más la falta de respetu de la llamada Conseyera de Cultura, doña Ana González, que nunca nun acudió a un actu nel que fuere protagonista la nuestra llingua. ¿Tantu ascu-y tien, ho? Porque, coime, un día podía enquivocase y dar la cara frente a los que defendemos un patrimoniu nuestru tan importante como’l llingüísticu. En fin, que nun creo qu’ella pueda dicir, como Fidel Castro, la Historia me absolverá, porque cuido que dende esi puntu de vista, yá ta condenada. Como la llingua. Y hasta l’añu que vien, si ye que llegamos…