Un avezáu llector d’esti blogue -que los hai- entrúgame vía mail que si puedo enanchar un poco lo que l’otru día dixi, al rodiu del fallecimientu de Vilareyo, sobre la película que se basó na mio novela La’aire de les castañes. Como ye un poco amuesa del mou en que se faen les coses n’Asturies, vuelvo a cuntalo anque yá lo fici nel llibru Las novelas de Gijón, de Álvaro Ruiz de la Peña y Elena de Lorenzo.
La mio sobrina Eva Lesmes ye guionista y direutora de cine con varies películes nel so haber. Amás, dende va yá unos cuantos años, dirixe en Madrid una escuela llamada «Central de cine», pa la formación d’interpretes, guionistes y direutores. Cuando lleó L’aire de les castañes, entusiasmóse cola idea d’escribir un guión y presentalu al entós recién naciu Premiu Pilar Miró (1999), de l’Academia de les Ciencies y les Artes de Televisión. Hubo que tornar la novela al castellán y llueu trabayar sobre’l testu. Eva fizo la estructura del guión y yo collaboré na parte de los diálogos. Cuando falaba la xente de Cimavilla facíalo n’asturianu (un asturianu cenciellu, claro). Presentamos el trabayu y resultó ganador ente un total de 82 obres presentaes. El premiu yera de tres millones de les antigües pesetes y la publicación del guión a cargu de la SGAE. El presidente del xuráu yera, na menos, que’l gran Antonio Mercero. Cambiamos el títulu, por ser d’una referencia mui concreta, y punxímos-y «A simple vista». La publicación fízóse l’añu 2001, nuna coleición de la SGAE que se llama Guiones y con un prólogu del tamién gran Jaime de Armiñán.
Yá que l’aición de la película -como la novela- desendolcábase n’Asturies -Xixón y Uviéu principalmente- el
Presidente de l’Academia de les Ciencies y Artes de la Televisión, pol so llau, y nosotros como autores pol nuestru, unviamos al Presidente del Principáu, d’aquella don Vicente Álvarez Areces y al conseyeru de cultura, don Francisco Javier Fernández Vallina sendos guiones comentando la posibilidá de que’l Gobiernu Asturianu subvencionara una parte del presupuestu pa facer la película. Cuntaríase con actores asturianos, equipos téunicos asturianos (na midida que se pudiere), llocalizaciones asturianes y parte de los diálogos falaos n’asturianu. Yera poner cultural y cinematográficamente a Asturies nel mapa. ¿Imaxináis lo que pasó? Silenciu alministrativu. Nin una pallabra. Nin siquier un acuse de recibu al presidente de l’Academia de Televisión. Tiempu depués, esto yá escaecío, dalgún babayu faló de facer d’Asturies un gran «plató» pa que vinieren a rodar películes los foriatos. Como n’Almería, vamos.
Pero’l percorríu del guión siguió p’alantre y asina, fue escoyíu d’ente un balagar d’ellos pola FORTA, o seya, la Federación de Televisiones Autonómiques d’España, pa facer una película y proyeutala nes distintes televisiones de la federación. La televisión pública vasca fue la que s’interesó nel rodaxe de la película, pero… tenía que ser rodada nel País Vascu, con actores vascos y con dellos cambeos nel guión. Y ehí fue onde yo dixi que non. Eva Lesmes dirixó la película, ficiéronse los cambeos nel guión, camudóse-y el nome por La noche del escorpión, y salvo Miguel Molina nel papel de Rambal, el restu fueron actores vascos. La mio única referencia na pelí ye nos lletreros del principiu onde pon dalgo asina como: «basada en una idea de Vicente G. Oliva». Y puntu final. La película pasó poles televisiones autonómiques, creo que hasta la TPA la punxo, y equí paz y llueu, gloria non, claro. Más bien vergoña. Pero ta bien qu’estes coses se sepan, anque nun valga pa muncho.
