Hubo un tiempu, non mui llonxanu, nel que los intelectuales «serios», esos que llimpien, afiten y dan rellumu a la lliteratura, los «popes» de la escritura, veíen con malos güeyos eso que se da en llamar «lliteratura de xéneru». Lo que yo llamé, n’otros sitios, «lliteratura de kiosku» por ser ellí onde, mayormente, podía mercase. Noveles de ciencia-ficción, d’aventures, de crímenes, de vaqueros y tamién d’amor, claro. Cola gran Corín Tellado (anque sólo seya pol numberu de llibros) como reina del asuntu. Ente los autores había de too, dende los grandes clásicos de los xéneros: Ágatha Christie, Simenón, Edgar Wallace, Chandler, London, Verne, Salgari… hasta españoles que debíen firmar con alcuñu por tener dalguna cuenta pendiente col franquismu o, cenciellamente, por internacionalizar un migayín el so nome. Asina Silver Cane, qu’escribía noveles de vaqueros por un tubu, yera Francisco González-Ledesma. O Clark Carrados, que yera Luis García Lecha, con más de 600 noveles de ciencia-ficción a les sos espaldes, ente otros munchos más. Ensin escaecer aquelles coleiciones mítiques como la Biblioteca Oro, de la Editorial Molino, etc. etc.
El casu fue que los escritores repunantes tuvieron qu’acabar tragando, y más agora en que abunden los premios pa los escritores de xéneru, como nel casu de los Premios Príncipe d’Asturies, onde fueron gallardonaos Margaret Atwood, qu’escribe llibros de ciencia-ficción, o Fred Vargas y Leonardo Padura que lo faen de novela negra o de detectives. Tamién agora n’Asturies hai escritores más o menos famosos que se pasaron a la lliteratura de xéneru, anque pa nun dar el brazu a torcer del too, cuando falen de la so obra o presenten la ayena dicen como disculpándose: «Bueno, esto paez una novela negra, yá lo sé, pero ye que detrás d’ella hai munches otres coses…», como si en les demás noveles negres nun hubiere tamién «munches otres coses».
Roberto González-Quevedo nun necesita disimular pa escribir una novela de detectives, xéneru nel qu’hai autores bonos, regulares y malos… como en cualquier clas de lliteratura. Fízolo primero con «Sangre na braña» y repítelo agora con «Los crímenes de Pumarín». Dicho lo cuál, tengo que me desdecir porque al mio modestu talantar esta cabera novela suya nun ye una novela negra, nin una novela de detectives. Sí, ye verdá qu’hai sangre, y muertos, y policíes -mayormente muyeres- y hasta un famosu detective internacional, el comisariu Dalgliesh-Muxivén que ye’l que soluciona l’enguedeyu. Hai too eso, pero como diríen los escritores repunantes, nun ye de lo que l’autor quier falar. Yo definiría lo que Roberto González fai como «un divertimentu biográficu», nel que l’autor recientemente xubiláu, recuerda un poco’l pasu pola so vida anterior con un migayín de señaldá y un muncho de xuegu intelixente. Y amás, aprovecha pa saldar dalguna cuenta pendiente. Él ye’l protagonista de la novela, el famosu inspector d’apellíu estranxeru, pero ñacíu en Palacios del Sil, a ratos escritor y qu’escribe nuna llingua propia de la zona. Autor de «La nieve de Pesicia», diviértese cantando con unos collacios que se llamen «Los Ñerbatos». Namás falta poner el númberu del DNI.
Pero amás d’esta presencia lliteraria del autor, en «Los crímenes de Pumarín» ta tamién gran parte del mundu referencial de Gonzalez-Quevedo: la filosofía, l’antropoloxía, la llingüística y la enseñanza de toes elles nun institutu de la capital uvieina. Y xunto al rescate d’estes elevaes materies, ta tamién la otra parte «non tan elevada» de les asignatures: los rancores ente los profesores, los trapicheos ente los departamentos, les crítiques y zancadielles ente los enseñantes… Y dientro d’esti axuste de cuentes xeneralizáu, tampoco nun salen mui bien paraes les asociaciones de padres y madres d’alumnos, parte inxerta na trama de la novela. Y ye que Roberto muéstrase inmisericorde con toos ellos. Per otru llau, na forma na que ta escrita la novela hai tamién una parte grande de xuegu, nes cites, nes repeticiones d’aniciu de los capítulos, nos topónimos y nomes propios. Y too ello exaguao por unes partes bucóliques y unes descripciones poétiques que nos recuerden al autor d’esa nieve pésica d’autoría compartida. Trátase, entós, d’un llibru prestosu, cultu, divertíu y xuguetón que nun tengo más remediu que recomendar. Norabona al amigu y gran escritor Roberto González-Quevedo por esta bocalada d’aire fresco dientro la nuestra lliteratura.
«Los crímenes de Pumarín»
Roberto González-Quevedo
Col. Los osos de Pesicia
Ed. HiFer
2019
