Llistu, coñón, polemista, gran poeta… Dexónos Pablo Ardisana. Facía munchu tiempu que nun lu vía y, poro, el mio postrer recuerdu d’elli ye antiguu. Entovía lo recuerdo. Fue nuna presentación nel salón d’actos de la Biblioteca Xovellanos de Xixón. Nun sé de que diba la cosa, pero yera al rodiu d’otru gran poeta: José García Pelaez. Depués de sentir falar un cachu grande a otros invitaos sobre les escelencies de «Pin de Pría», cuando-y tocó’l turnu lo primero que dixo fue: «Por favor, nun sigan llamándolu Pin de Pría, esa ye una cosa de Xixón. Perellí d’onde yera él y d’onde soi yo fue siempres «Pepín de Pría». Tomen nota». Xeniu y figura. Y, depués de tantes escelencies, mira tú por qué cosa tan cenciella lu recuerdo agora. Que la tierra-y seya leve.
Pablo Ardisana, in memoriam
