Esti martes, día 15, na Casa Cultura d’Avilés, vamos presentar el «cuentiariu» de Milio Mariño «El xaretón del embeligru». Vamos tar ellí, amás de la responsable de la editorial Suburbia, Silvia Cosío, l’autor y esti qu’escribe, en funciones de presentador. Aseguro a los que vaigan perellí que nun sedré mui «peñazu», o seya, que nun tendrán que sofrir muncho, pa dexar que fale Milio que, en realidá, ye’l «mocín» del actu. Asina que yá lo sabéis: tais toos invitaos a pasar perellí p’abellugar al autor y a la editorial, agora que tamos pasando un momentu tan malu pa la edición de llibros n’asturianu. Llueu nun val quexase de que too desapaez. Na nuestra mano ta’l da-y un sofitu p’aidar a la so supervivencia. Dir a esti tipu d’actos, mercar el llibru… son coses necesaries si daveres queremos que la cultura asturiana nun muerra. Hai otra xente tamién responsable, pero nos nun podemos escaecer la nuestra responsabilidá. Ellí vos esperamos.
