Yá escribí nesti mesmu blogue dalguna cosa sobre la lliteratura nixeriana, encabezada por la gran Chimamanda Ngozi, de la que reseñé «Medio sol amarillo» y «Algo alrededor de tu cuello». Una guapísima novela y un llibru de rellatos, respeutivamente. Vuelvo agora a falar d’ella (de la lliteratura, non de Chimamanda) pa referime a la última perla d’esi país tan ricu en cultura y tradiciones. «Quédate conmigo» ye la primer novela de la mui moza escritora Ayobami Adebayo (lleva un montón d’acentos pero nun sé ónde ponelos), ñacida en Lagos en 1988, polo que tien namás que 37 años pero yá ye conocida en mediu mundu.
La lliteratura d’Adebayo tien, como la de la Ngozi, esi amiestu de tradición y modernidá que marca a los escritores africanos. Atiendi a los tiempos modernos, ya inclusive dellos de los sos protagonistes pasaron pola Universidá pero, al tiempu, nes families, y na vida cotidiana de los pueblos, pesen entovía unes tradiciones arraigonaes no más fondo de la so cultura, de la so mentalidá, de les sos creyencies. Ello produz unes contradiciones personales y sociales coles que tienen que cargar aquelles persones que quieren salise del rebañu, que quieren vivir acordies con unos tiempos que yá dexaron de ser máxicos pa camudase en teunolóxicos. Nesa llucha hai sufrimientu, hai desgarru y hai muncha infelicidá porque dambos mundos son perdifíciles de conxugar y, nun siempre, eses persones, mayormente muyeres, llogren llevala a bon puertu.
Yegide y el so maríu viven rellativamente felices pesie a nun tener fíos, pero la familia y la sociedá esperen d’ellos un descendiente que venga a consolidar dambes instituciones. Y el nun poder tener fíos ye una especie de maldición que va a siguir a la pareya col trescursu del tiempu. La cosa llega al puntu de querer sostituyir a la muyer por otra, que faiga lo que, supuestamente, ella nun ye a facer. Esti ye l’arranque de la novela porque Yegide nun ta dispuesta a pasar por ello. Y ella camienta que la so pareya, un home polo demás modernu, col que coincidió na Universidá, ye del so mesmu paecer. Pero les coses se-yos compliquen.
Hai un tresfondu políticu nel desarrollu de la historia, como son les revueltes sociales y polítiques de los años 80 en Nixeria, pero la verdá ye que l’autora nun afonda nelles sinón que les usa namás que como un decoráu, válidu mayormente pa cuntar como se conocieron los protagonistes. La novela ye dura, en dalgunos momentos desgarradora, pero Adebayo sabe remanala ensin que se-y vaya de la mano, anque’l tema caiga dacuando en momentos dramáticos. Ye, en resume, una prestosa novela d’una escritora a la que-y deseyamos un bon futuru que, a la vista de lo visto, seguro que lu va tener.
