Ye la primer novela qu’escribió l’escritor escocés William Boyd (Ghana, 1952) y lleva por títulu: «Un buen hombre en África». So padre yera mélicu especialista n’enfermedaes tropicales y so madre maestra. Los primeros años de la so vida anduvo pel continente africanu hasta que s’allugó na patria de sos padres, Escocia y otros llugares de Gran Bretaña. Pol so estilu compárolu col gran David Lodge ya inclusive col Ian McEwan de «Solar», anque nesta novela Boyd emplega un humor más truculentu.
«Un buen hombre en África» ye una divertidísima novela que siempre se llee cola sonrisa nos llabios y, dacuando, fáite soltar la carcaxada, como pue apautase en reconocer la mio muyer a la que pegué un par de xirpíos por mor de les rises provocaes. Al protagonista, Morgan Leafy, secretariu del consul inglés en Kinyanya, un supuestu país del África occidental, yá nun puen pasa-y más llaceries de les que-y asoceden nesta historia, por mor de conservar el so puestu nesi perdíu requexu d’una antigua colonia británica. Tien problemes cola so amante africana, col lider del partíu «kinyanyes» que va a ganar les eleiciones vinientes nel so país, col so superior y cola fía d’esti, a la que desea pero que nun ye quien a llograr. La novela ye una socesión d’enredos de los que’l bonu de Morgan sal como pue, col envís puestu en colar del país y consiguir un ascensu na so carrera diplomática, que tien a piques de fundir. La prosa de Boyd tien esi encantu de los bonos escritores ingleses que, dende un llinguax cenciellu pero cargáu d’ironía, ye capaz d’afondar nos problemes que-yos cinquen ensin despeinase. El nuevu colonialismu, les rellaciones de pareya, la diferencia de mundios culturales, el custionase los principios más sagraos, son trataos pol escritor escocés con esi llamáu «humor inglés» que a dalgunos nos encanta.
Novela qu’encamiento, encesamente, a tol que quiera entretenese cola llectura d’un bon llibru que ye dalgo más qu’una distraición. ¡Bien por William!
