close
Una gran Butterfly

Una gran Butterfly

Madama ButterflyCuando nel escenariu too funciona, y cuando esi bon funcionamientu llega’l públicu, produzse esi momentu máxicu, esa comunión d’obra y espeutador cuyu resultáu ye l’ésitu. Eso fue lo que pasó la nueche del vienres nel estrenu en Xixón de Madama Butterfly. La obra de Puccini nun ye fácil, si ye qu’hubiere dalguna ópera que lo fuere. Y nun lo ye porque tola obra, esceuto los primeros diez minutos, recai sobre la figura omnipresente de la protagonista. Esa neña que principia la so relación col caradura de Pinkerton, oficial de la marina estadounidense, a la edá de 15 años, y termínala tres años depués col tráxicu final que toos conocemos del suicidiu col cuchiellu ritual de so padre. Un cuchiellu que yá taba bien entrenáu. Esi trabayu agotador de la soprano necesita, nun sólo una gran voz, sinón tamién unes importantes cualidaes escéniques pa movese pol escenariu con soltura y oficiu.

Les dos coses fizo abondamente la estremeña Carmen Solís, soprano de bon timbre y que se desenvuelve perfeutamente nos tonos altos pero que, amás, supo interpretar el so papel con una sensibilidá acordies col guapísimu llibretu de Luigi Illica y Giuseppe Giacosa. Ye dicir, con puxu dramáticu, inclusive desgarráu, cuando lo necesitaba, y con suavidá y tenrura cuando yera menester, sobre too nes escenes col neñu que xubieron muncho la emotividá de la sala. Esa emoción qu’españó en dellos momentos, como nel aria «Un bel di, vedremo», una de les parte más conocíes de la guapísima obra de Puccini.

Al rodiu d’ella, el restu l’elencu nun desmereció, con un Eduardo Aladrén, nel papel de Pinkerton, que gocia d’unacarmen-solis-1 voz de tenor clara y segura nos agudos y que desendolcó’l so ingratu personaxe (ye’l «malu» de la obra) con aciertu y desenvoltura. En plan americanu-despreocupáu-que vien-de-ligue, nun principiu, y col dramatismu de saber el gráu de culpabilidá que-y correspuende, nel final de la obra. La mezzo-soprano Marina Rodríguez-Cusí borda’l so papel de Suzuki, la doncella de Butterfly, con una mecia de contención y desesperu al ver hacia ónde conduz aquel ciegu enamoramientu de la so ama. Lo mesmo asocede col restu los actuantes, mui axustaos a los sos papeles.

La Orquesta Oviedo Filarmonía sonó con munchu rellumu, quiciás escesivu en dalgún momentu que cuasi llega a tapar les voces de los protagonistes -nel primer actu- pero que llueu corrixeron abellugando o resaltando a los cantantes cuando correspondía. Y un apartáu mui  especial pa la coreografía y el ballet, que ficieron d’esta Madama Butterfly un espectáculu total, con mecia de teatru, música y ballet al seviciu d’una opera de las grandes, nun sólo del maestru Puccini, sinón de tola historia de la opera. Ésta, como digo siempre nestos casos, ye la opinión d’un meru aficionáu al xéneru, dispuestu a escuchar a voces más entendíes. Pero eso sí, los profanos, esfrutamos.