Los xubilaos siempre fueron un coleutivu social respetáu. Trátase d’unos homes y muyeres que trabayaron tola so vida llaboral, dexando lo meyor d’ellos mesmos nunos trabayos munches veces duros, insanos o pelligrosos. Nun se trata de mitificar a naide, habrálos que lo consiguieron con menos esfuerzu pero, fuera como fuere, el país beneficióse de la so aportación llaboral, y les arques del estáu de les sos cotizaciones a lo llargo de cuarenta años. Asina fueron a entendelo tolos gobiernos que nunca nun s’atrevieron a quita-yos nin siquier el so pequeñu poder adquisitivu, asegurándo-yos, cuando menos, l’equivalente al indiz del coste de la vida.
Pero estos sinvergüences del gobiernu, alendaos y aplaudíos pol capitalismu internacional (nun ye una fras fecha, ye la realidá, namás hai que mirar les declaraciones del FMI, de la CEOE o cualisquier otru organismo d’esa calaña) perdieron los pocos escrúpulos que-yos quedaben y tán entrando a sacu a “recortar” les prestaciones, y a endurecer les condiciones de pertenencia a esi coleutivu de xente indefenso. Abrióse la veda del xubiláu: disparen sobre ellos.
Asocede, amás, que como esi grupu de xente entovía tien el drechu de votar (ye raro que nun se planteguen quitá-yoslu, total ya nun trabayen…) los gobernantes tienen mieu de que los “castiguen” nes urnes y voten a otros partíos, colo qu’hai que disimular el robu faciéndolo que paeza una «correución téunica». ¿Cómo? Mui fácil: nómase una Comisión d’Espertos que faiga una valoración del tema y proponga unes conclusiones. Too llimpio y ecléctico. Nun hai sangre. Lo que pasa ye qu’esa comisión, claro, escuéyenla ellos al so interés y pa que concluya lo qu’ellos quieren facer: el robu.
Total que de los 12 miembros d’esa comisión de supuestos “expertos”, diez provienen de la Banca o de les grandes
empreses aseguradores aconceyaes en UNESPA, la gran patronal del seguru: Victor Pérez, Rafael Domenech, Miguel Ángel Vazquez… Otros de FEDEA, qu’axunta a grandes bancos y empreses: Conde-Ruiz, etc. y dalgunos otros que provienen de FAES o tienen un marcáu calter conservador. Estos «exemplares» son los que van a aconseyar al gobiernu qué facer coles pensiones y los pensionistes. Yá sabemos: “xunta de llobos, oveyes a tremar”. De mano yá se conocen dalgunos de los sos «imparciales» conseyos: nun arreyar la pensión a la xuba del IPC, sinón a unes supuestes condiciones económiques del país; diferenciar les pensiones según la esperanza de vida, o seya al que muerra pronto pue dáse-y un poco más, etc. Y amás, por si acasu, con efeutu retroactivu.
Too esto asocede nun país onde les grandes fortunes nun dexen de medrar, onde florez la corrupción per tolos llaos, onde se axuda a los bancos desfalcadores a salir de problemes, etc. etc. A la vista too esto, un tien la tentación de glayar xunto a Mafalda: ¡Que paren el mundu, que me baxo!
