Cuando se cambien les regles mientres se ta xugando la partida ún, o seya yo, nun pue dexar de sentise engañáu. Cuando principié a trabayar, allá pelos años 60 del sieglu pasáu (¡vaya cómo suena!), de la nómina que cobraba quitábenme dos grandes cantidaes: lo que me reteníen pa pagar el impuestu de la Renta de les persones físiques, y lo que me quitaben pa la Seguridá Social. Esto yera dalgo que pagaba «al Estáu», al marxe de la forma de gobiernu qu’hubiere en cada momentu: d’aquella la Dictadura, llueu la UCD, los Socialistes, el PP, etc. La Seguridá Social ye una hucha, me dicíen. Mientres trabayes, tas metiendo perres nesa hucha y cuando dexes de trabayar y te xubiles, la hucha va a pagate a ti. Vas cobrar menos, pero tendrás la sanidá y les melecines gratis. Esi ye’l pautu.
A lo llargo de 40 años pagué relixosamente los mios impuestos y la mio Seguridá Social. Tampoco tuvi ocasión de nun facelo, o seya, de nun pagar, pues cuando me llegaba la nómina ya me lo quitaren pola mano, imposible defraudar anque quixere, como facíen otros. Durante esos 40 años nun cobré inxamás nin un duru del Paru, nin coyí la baxa por enfermedá, quitando una selmana que tuvi un poco anemia. Ya sé qu’eso nun ye méritu míu, sinón de la xenética y de la suerte, pero’l casu ye que fue asina. Y resulta qu’agora, qu’ acabo de xubilame, vien el gobiernu del señor Rajoy a dicime que non, qu’aquel contratu que firmé col Estáu Español nun val. Que de magar agora, tengo que pagar les melecines, o seya, rebaxar la mio pensión de xubilación. Y que, cuantes más melecines necesite, o seya, cuanto más enfermu tea, más tengo que pagar. Bueno, si pasa d’un tope devuélvenme daqué, nun plazu de 6 meses. ¡Paez de coña! ¡Oiga y aquello de la hucha…! Como de Fernández (que dicía Pepe Iglesias «el zorro»), nunca más se supo.
Abúltami que nun puen dicise más mentires que les que nos «coló» esti gobiernu. Nun diben xubir impuestos, nin
tocar la sanidá, nin la educación. Yeren unes llinies «roxes» que nun trespasaríen. Y los xubilaos… Bueno, esos que tuvieren tranquilos que nun sólo nun diben recortar les pensiones sinón que xubiríenles un poco. Agora muevo los cubiletes y dimi ónde ta la bola, verás cómo aciertes. Pero pon les perres primero. Y menos mal qu’esti ye un gobiernu de dereches, o seya, temerosu de Dios y que nun pue pecar nin dicir mentires, nun vaiga a ser que Rouco los excomulgue, que si non…
Llamentablemente’l mio casu nun ye lo peor d’esti asuntu. Pese a la xugada de los cubiletes, nun voi pasar fame nin a desconectame d’internet. Lo peor ye lo de los estranxeros que residen n’España, pero que-yos falta dalgún permisu alministrativu. Niégome a llamalos «illegales», porque nengún ser humanu pue ser «illegal». A esos quíten-yos la tarxeta sanitaria dende’l mes d’agostu prósimu. ´¿Resultáu? Al mio xuiciu delles coses mui clares: a) Van colapsase los servicios d’Urxencies de los hospitales y ambulatorios, únicu llugar a ónde puen acudir. b) va a crease una bolsa de mercáu (negru o blancu) pa determinaos medicamentos y servicios. c) Va a haber pelligru ciertu d’espardimientu de determinaes enfermedaes que, de nun atayales, puen convertise nun riesgu d’epidemia. Eso que se m’ocurra de momentu. Y, claro, eso nun tien nada que ver con eso que se llama «turismu sanitariu», onde unos xubilaos millonarios de paises europeos vienen a España a operase de lo que nun s’operen nos sos paises. Que nun lo mezclen. En fin, a ver cuál ye’l prósimu pasu d’esti gobiernu, que ta batiendo’l record Guiness de desmontaxe d’una sociedá del bienestar y del pasu a una del «malestar». Yo, dende llueu, si los tuviere votao, tirábame per Santa Catalina.
