Esti pasáu vienres asoleyó’l diariu La Nueva España una páxina de publicidá pagada que, embaxo’l titular «Oficialidá del asturianu: porque agora ye la hora», diba roblada por una gran cantidá d’asturianos y asturianes que prestaron la so firma, y les sos perres, pa sofitala. Abúltame que la intención de los entamaores nun yera tanto escoyer unes persones concretes que sofitaren el manifiestu (podía haber otros nomes mesmamente válidos), cuanto que na firma del mésmu hubiere una participación unitaria de xente d’estremaos signos políticos. Asina, podíen vese a persones del Partíu Popular, de Foro, del Psoe, d’Izquierda Xunida, de Podemos, de Comisiones Obreres, de la UXT, de SUATEA… xunto a otros profesionales rellacionaos col mundu de la educación y de la cultura.
Toos ellos, que se representaben asina mesmos -anque sería fato dicir que xuntos nun lo facíen d’ un arcu socio-políticu amplísimu- suscribíen un manifiestu nel que se condenaben coses como «que se ignoren los derechos lingüísticos de sus hablantes, en abierta contradición con la práctica de otras comunidades que, haciendo suyo el mandato constitucional, protegen jurídicamente la cooficialidad, los derechos de los ciudadanos, respectivamente, gallegos, navarros, vascos, catalanes, valencianos, baleares o araneses». Reclamando a los partíos políticos que van presentase a les prósimes eleiciones, «la solución jurídica de la cooficialidad…», faciendo un brinde a esos partíos políticos -cuasi toos representaos nes firmes axuntes- pa que «actúen asumiendo programáticamente la necesidad de un gran consenso político y social en torno a la oficialidad del asturiano que tenga en cuenta la situación sociolingüística de Asturies, las medidas de planificación necesarias para su aceptación social y, en definitiva, las
condiciones de su puesta en práctica real y efectiva».
Esti manifiestu tien, nestos momentos, un importante valir cara a les prósimes eleiciones polítiques. Yá naide pue llamase a engañu, hai una parte importante cualitativa y cuantitativamente d’asturianos que piden la oficialidá de la so llingua. Peme que los argumentos qu’ hasta agora se dieron pa nun facelo, yá tán avieyucaos, si ye que dalguna vez nun lo estuvieron. N’efeutu, agora ye la hora de solucionar «una de las cuestiones más incomprensiblemente pendientes desde la transición democrática: el tratamiento de la lengua y la cultura asturianas», como diz el manifiestu. Un manifiestu que yo firmé, porque asina me lo pidieron, pero que anque nun lu firmare fadría míu, porque ésti nun ye’l momentu de personalismos sinón de facer lo que, va munchos años, dicía la canción de «Ñuberu»: «Compañeru dame tira«.
