Hai un dichu popular qu’afirma que, «una cosa ye ser probes, y otra miserables». Probe ye, claro, el que nun ye ricu. El modestu, el que tien que s’arreglar colo xusto, pero qu’entá conserva la dignidá. Por eso tamién se diz: «probes, pero honraos». Pero hai tamién otra clas de probes que ye muncho peor: los probes que son miserables. Que yá perdieron hasta eso que nunca nun debe perdese: la dignidá.
Entamo con tou esti rollu metafísicu pa comentar una noticia que vien en «La Nueva España» y que m’enancha’l mio amigu Dubardu Puente. Esti añu tamién va a haber representación asturiana nun actu de renome mundial, nel que’l nuestru País lleva acudiendo va unos años con sonoru resultáu: El Día de San Patricio en Nueva York, que se cellebra’l 17 de Marzu. Sólo, que’l grupu que representa a esti pequeñu, y yo suponía qu’arguyosu País, tien que se financiar el 100% de los gastos que se produzan. Esi grupu va a ser La Banda de Gaites «La Reina’l Truébano», de Navia, pero qu’aconceya a gaiteros de varies villes del occidente asturianu, dirixíos por Luis Feito, y que dirán encabezaos pol representante del Saint Patrick Day Parade pa Europa, el gaiteru Bras Rodrigo.
Hai que recordar, pa los que nun lo sepan, qu’esti famosu día ye la fiesta de la importantísima comunidá irlandesa en
Nueva York, qu’al desfile asisten, in situ, cientos de miles de neoyorquinos, y qu’otros 300 millones venlo a traviés de la «tele». La nuestra pequeña comunidá tien ellí un reconocimientu especial, y ye una manera de dar a conocer una cultura milenaria, que pretende siguir siéndolo, pa formar parte d’esa otra Cultura, con lletrones más grandes, que ye la Cultura Universal. Recordar, tamién, que, amás del desfile, el más antiguu del mundu, la nuestra delegación entamaba ellí unes Xornaes de Cultura Asturiana en Manhattan, en collaboración colos emigrantes, y fíos d’emigrantes que trabayen en centros docentes de NYC, y qu’investiguen sobre Asturies.
Pues bien, como digo, esti añu nun hai nengún sofitu oficial, nin institucional nin lloxísticu, asina como axuda pa los billetes de los gaiteros. Caún tien que pagar el suyu, y del agospiu faise cargu el Centru Español de Queens. Dicir, pa ver la magnitú del desastre, que les Xornaes de Cultura Asturiana en Manhattan, qu’esti añu se suspenden por falta perres, cuesten dos mil euros. Póngolo con númberos: 2000 euros. Una cifra que da la risa hasta’l dicila. Pero hai una cosa más pa los que tenemos memoria o hemeroteca: el Presidente de la Xunta del Principáu, señor Sanjurjo, recibió nesta institución a l’ «Asociación de Amigos del Desfile de San Patricio de Nueva York». La fecha del sueltu de prensa ye’l 12 de febreru de 2013, o seya va poco más d’un mes. Lo que dixo naquella ocasión fue que la presencia ellí «es una oportunidad magnífica para hacer visible Asturias en el corazón del mundo«, frase un migayín «cursi» pero mui nidia. Y repitió, un poco más alantre, que daba les gracies a los integrantes de la organización por «hacer visible Asturias en una 
ciudad «multicultural» como es el caso de Nueva York».
Hai una canción italiana, que cantaba Mina, y que yera mui popular va tiempu. Repitía aquello de «parole, parole, parole…» Pues eso, pallabres y sólo pallabres. Bien ceo se-y acabó l’enfotu al «presi» del parlamentín asturianu, o ye que ya nun interesa facer visible a Asturies. Yo camiento que ye eso, que lo nuestro ye la invisibilidá: una cultura invisible, pa una sociedá invisible, remanao por unos políticos invisibles. Paezme, entós, que’l títulu d’esti pequeñu comentariu ta bien xustificáu: Probes… y miserables.
