David Rivas, claro. Dalgo hai que dicir ¿non? ¿Pero qué? ¿Nun ta too dicho? ¿Non lu acompañamos hasta l’últimu momentu? Sí. Pero dalgo hai que dicir. Que yera especial. Pero en realidá toos somos especiales. ¿Qué podría destacar de la so «especialidá»? El ser humanu yá nun ta equí, y nun val dicir eso de que «…allá onde esté…», porque una de dos, o somos creyentes y creyemos que ta en Cielu, o nun lo semos y creyemos que lu acoyó la tierra. Lo demás son recursos lliterarios o les ganes enormes de qu’esista en dalguna parte, persabiendo que nun ye asina. Quédanos, pues, la imaxen d’elli. El so xeitu. Lo que sentimos los que lu tratamos. El so recuerdo, en definitiva. Y llueu, el curriculum. L’escatafín del so pasu pela tierra. Y llámame l’atención d’esi curriculum la diversidá d’estayes nes qu’anduvo, y sobre too, lo estremaes que fueron, al puntu de que dalgunes paecen contraries, incompatibles. ¿Cómo se pue ser, anque seya socesivamente, anarquista, comunista, nacionalista, racionalista, animista, xuerguista, repunante y otres cuantes coses que podríemos amestar a la llista? Ensin embargu, abúltame que lo fue too, en conciencia, ensin impostures. Y sería un tópicu el dicir qu’él yera asina. Pero yéralo. Y xunto a ello, el compromisu con toles causes dignes (o non) de defensa que lu arrodiaron na sociedá na que vivió (y cuéstame falar en pasao) Y la so llealtá como amigu. Porque produz estrañeza que, por exemplu, siguere respetando y falando bien d’una persona como Ramón Tamames que pasó de la izquierda radical a aquel papelón que fizo nel Congresu como candidatu de Vox. Pues supo disculpalu. Porque yera’l so mentor y amigu. Como abrazó otres causes seguro que por esa mesma amistá. O por llealtá. Bueno, yá ta. Yá dixi daqué. Dalgo tenía que dicir. Toes estes pallabres nun son más que fumu. Tonteríes pa poder falar d’él agora que yá nun ta. Pa poder sentir que tovía anda perhí buscando unes coses que-y pidí un par de díes enantes de lo d’esti día. Del día innombrable.Más nada se m’ocurre. Quedé un poco como vacíu. Pues eso. Alón. David Rivas.
P.D. La semeya nel Antiguu Institutu ye la última que tengo d’él.
