1.- El branu metereolóxicu fue, una vuelta más, una mierda. Sentir a los «espertos» falar na tele d’Asturies ye como ver una peli de ciencia-ficción. Sigui teniendo valir lo del vieyu chiste de que, esti añu n’Asturies el branu cayó en xueves y vienres.
2.- Pesie a ello (o igual por ello), Xixón tuvo enllena de foriatos que faen qu’un tenga qu’abellugase n’aldea y baxar al pueblu namás por necesidá alimenticia.
3.- Los dos enemigos del alma del branu xixonés fueron l’Ayuntamientu y Otea. En connivencia. Nun sé que rellación nun conocida traen ente sí, pero el primeru (la Casa Conceyu) paez un títere en manes del segundu. Fai tolo qu’esti promueve, incluyida la «cutrez» de les casetes de Begoña. Unes casetes asitiaes delantre d’otros negocios d’hostelería, que paguen relixosamente (o llaicamente) los sos impuestos tol añu, y que se ven privaes d’unes ventes, nes feches de más movimientu del branu. Pa más «inri», les casetes, d’una rusticidá ablayante, dexen la basoria, caxes y contenedores na parte atrás, o seya, xusto a la vista de los negocios «llegales». Y llueu falen de «gran ésitu» porque aquello ta enlleno xente, o seya, como tolos díes del añu. Otea, que son solo parte de los hosteleros, yá falen d’espardelo per más sitios. L’ayuntamientu diz que: «Amén». Yo digo que ye dalgo vulgar, «cutre», puerco, ya insolidariu col propiu sector que nun son de los d’ellos.
4.- Falando de «cutrez» hai que falar de los Toros. Porque, nun ye sólo que seya un espeutáculu sanguinariu, que debiere molestar a la sensibilidá de cualaquier persona civilizada sinón que, amás, ye una cosa rancia, «demodé», a la que va xente de la «farándula» y los cuatro figurones de siempre. L’asistencia nun pasó de media entrada, nuna ciudá de 300.000 habitantes más turistes. Por cierto ¿qué facíen los direutivos d’Otea nel Palcu l’Ayuntamientu? ¿Ye tamién d’ellos o ye parte d’esa connivencia de la que falemos?
5.- Como tolos años tuve na Feria de Muestres. Esti añu peor, pesie a lo que digan los qu’inventen los números d’asistentes. Siempre seleiciono los mesmos stands que son los que me presten. El Pabellón d’Asturies tuvo bien, col tema del agua y les maquetes, animades, de dellos artiluxos, como una ferrería, un molín, etc. Amás, tol apoyu testual taba escritu en castellán y n’asturianu. A la escontra, el Pabellón de Xixón fízose a mayor propaganda de doña Moriyón y Cia. cola historia esa de lo que van poner (si ye que lo ponen) onde Naval Xixón. Y, claro, too en castellán. Menos nun sitiu (sólo un) onde poníen Gijón/Xixón. El de Masavéu, que siempre tien una guapa esposición de pintura, con mayoría d’asturianos, esti añu taba empobinada a unos pintores americanos, abstractos, que nun me prestaron nada. Y hasta les ruedones de calamares me paecieron más dures y más cares. En fin, menos trunfalismu y a facer meyor les coses. Y amás quéxense los xubilaos de que nun dan gorres, como aquelles de la Caxa d’Aforros. ¡Home, bah!
6.- Acabo. Hai que desmitificar eso de que’l turismu trae munches perres. Eses perres van parar a «la corexa» de los hosteleros y a una estaya mal pagada y abondo esplotada, por eso el personal ye ca día menos profesional y los clientes tamos peor servidos. Caro, malo y mal servido. Hai, como siempre, honroses esceiciones. Pal restu, too negativo: n’atención sanitaria, en coles en tolos sitios, en basoria pel suelu… Nun sigo porque me xube la tensión. Bueno, andái, qu’hasta l’añu que vien nun vos daré más «la brasa».
Semeya del autor.
