close
El «Big Bang» y los paises árabes (I)

El «Big Bang» y los paises árabes (I)

2013-08-27Paises árabesSiria454Visitas

bashar3Hai dalgunos temes (en realidá munchos) de los que, nun ye sólo que nun entienda nada sinón que, amás, danme un poco vértigu. Como si amoriara. Un d’ellos ye’l del famosu «Big Bang», del que tol mundu fala comos si fuere de la familia, y que a min pónme nerviosu. Porque eso de qu’un tea viendo agora la lluz d’una estrella que yá nun esiste tien cantu. Ye, más o menos, como creyer na Güestia.

Col asuntu de los paises árabes pásame como col «Big Bang», tampoco nun lo entiendo muncho. Pero como un tien que procurar tener una idea de tolo que lu arrodia, inclusive del universu n’espansión, yo tengo pa min unes cuantes impresiones coles que voi tirando p’alantre. Almito que cualquiera pueda dame lleiciones del tema y, humildemente, pido perdón si esbarrio demasiao.

Nel tema de Siria hai una cosa evidente (pa min): esi llargaritu un poco agaviotáu que ye fíu d’otru manguán coyonudu y que se llama Bashar al Assad, ye un ímpresentable y un asesín que, con tal de caltenese nel poder, ye capaz d’acabar col so propiu pueblu. Nun sé si emplega armes químiques o non, pero coles normales ya-y abasta y sobra pa matar a munchos miles de conciudadanos. La oposición, polo que yo atalanto, ye una mezclienda de grupos y persones que van dende xente más o menos demócrata, al so estilu, hasta otros arreyaos a Al-qaeda. O seya un combináu esplosivu y perdifícil de remanar. En conxuntu, tampoco nun son unos anxelinos. En cuantes a la guerra en sí, a min paezme qu’hai, dientro’l conflictu, tres guerres distintes: la primera, la de los que lluchen escontra’l llargaritu agaviotáu y el so criminal exércitu, tratando d’echalu y de poner dalgo más curioso al frente’l país. La segunda guerra, la que se da ente suníes y chíies que, pese a ser dambos bandos mui relixosos, lleven dándose caña dende tiempos inmemoriales. Yá sólo por eso, nunca podría creyer nesi dios al qu’ellos dicen obedecer. Ye ésta una guerra bárbara y despiadada na que too val con tal d’esterminar al enemigu, tamién fíu d’Alá. Y esta griesca ensin fin espárdese per auquiera, ensin lleis nin fronteres: Irak, Iran… La tercer guerra ye, al mio xuiciu, la que xueguen les grandes potencies por asitiase nun territoriu xeoestratéxicu mui importante.  Falo de los de siempres, los Estaos Xuníos, Rusia y China, pero tamién Israel y dalgún de los paises de la Unión Europea. Al igual que si se tratare d’un tableru d’axedrez, eses grandes potencies con grandes intereses económicos, mueven les sos fiches ensin importa-yos un res lo que-yos pase a les persones. Inclusive paez que dalgunes d’eses criticaes matances, como la de les armes químiques, viénen-yos perbién pa xustificar una intervención armada. Al rodiu d’ello hai munches voces autorizaes que falen de dalgo provocao precisamente pa esa xustificación. Y nun quiero dir más allá coles mios impresiones personales. El próximu día comentaré daqué d’Exiptu, que tien que ver en too esto, pero coles sos propies carauterístiques. Perdón pol atrevimientu.