Nun sé si será mui acertada la espresión «centinela» nel sentíu que yo quiero utilizala. Como’l que ta xixilante, sollerte, atentu a lo que pasa. Nesi sen ye nel que quiero yo referime al diariu decanu d’Asturies, «El Comercio», que yá tien cumplíos 135 años dedicáu, con gran enfotu, a informar sobro lo qu’asocede nesta ciuda na que ñací y vivo.
«El Comercio», quien lo dulda, ye un periódicu conservador. Siempre (el siempre que yo recuerdo) lo fue, y nunca nun quixo engañar a naide. Mio padre yá lu compraba y de la época en que vivía na casa familiar quedóme’l vezu de lleelu. Eso y que, pa tar medianamente informáu de lo que pasa na nuestra ciudá, nun te queda más remediu que mercalu. Ye verdá qu’hai otru periódicu que-y disputa’l tarrén, pero que siempres tuvo un «tufu» carbayón que lu acompaña dende l’aniciu. Los «de Xixón de Xixón», somos d'»El Comercio», pese al so conservadurismu y al «baxonazu» informativu que lleva dende’l cambiu de propiedá.
El diariu xixonés sacó l’otru día un suplementu especial que se titulaba «135 años en 50 portadas». El títulu dizlo too. Escoyeron 5o portaes d’esti sieglu y picu de vida, les que-yos paecieron más interesante o más llamatives, y ficieron con elles un cartafueyu pal recuerdu. Ye mui prestosu. Ente elles tán la del primer númberu; la de la inauguración de monumentos famosos, como la estatua de Pelayo o la de Xovellanos; l’asaltu al Bancu España por Durruti y «Los Solidarios»; los socesos d’ochobre del 34; el final de la Guerra Civil; la llegada del home a la Lluna… Fízome muncha illusión ver la de la visita de los Reis a Xixón, la del 20 de mayu de 1976 onde, xunto a otres pancartes de saludu había una de Conceyu Bable que ponía: «Puxa Asturies», que por cierto, quixeron que nun saliere pero terminó saliendo. Y, en fin, otru balagar d’elles que tampoco nun ye’l casu de retafilar. Pero xunto a estes portaes que presta relleer al cabu’l tiempu, hai otra cosa que quiero aprovechar pa comentar. Ensin querelo, porque nun yera l’oxetivu del suplementu, en tres o cuatro ocasiones apaez un comentariu -una especie d’editorial- de don Francisco Carantoña qu’avezaba a poner na portada, anque si la noticia yera mui importante (como ye en munchos casos), podía dir dientro. Pues bien, esos tres o cuatro editoriales de Carantoña que figuren, sirven p’atalantar el gran periodista que fue’l gallegu: agudu, críticu, intelixente… A tal puntu que, pese a la distancia ideolóxica que yo podía tener respeutu a elli, siempre lu almiré fondamente.
El primer de los editoriales de Carantoña que sal, correspuende al día de la muerte de Franco. Xueves, 20 de noviembre
de 1975. Titúlase: «Lo que haría imposible el futuro». Tou él nun tien desperdiciu, con frases como «la nueva monarquía que cualquier día va a empezar a funcionar necesita, más que adhesión, claridad.» Pero lo más destacable ye que, que yo sepa, ye la primer vez que se cita -col cuerpu entovía caliente del Dictador- la pallabra «consenso»: «…ese consenso sociológico que da eficacia y perdurabilidad a los sistemas». Agora que la pallabra ya repuna, habría que reconoce-y a don Franciso la so autoría. Y el segundu editorial (de los tres o cuatro recoyíos) ye del 25 de mayu de 1993, cuando’l famosu «petromocho», siendo Rodríguez-Vigil Presidente del Principáu. L’editorial titúlase: «Un ejemplo de necia obstinación» y tampoco tien desperdiciu: «El Ejecutivo del Principado no tiene fuerza moral para investigar nada ni a nadie. Es él quien debe ser investigado…». «Es necesario hacer averiguaciones y establecer responsabilidades pero nuestro pequeño gobierno no tiene en ese proceso el papel de acusador sino el de acusado». Pa finar diciendo: «Por el bien de Asturias, y por su bien personal, el señor Rodríguez-Vigil no debe seguir ni un día más asumiendo unas responsabilidades que están por encima de su capacidad. Da pena decirlo, pero es obligado hacerlo porque la obstinación en política no es eximente, sino agravante». El señor Rodríguez-Vigil, Presidente del Principado, dimitó al día siguiente. ¡Qué falta fadría otru Carantoña nestos momentos!.
