close
El cume de Glasgow: nin fríu nin calor

El cume de Glasgow: nin fríu nin calor

Finó hai unos díes el llamáu «Cume de Glasgow» o pol so nome completu «Cume del clima COP26». La mio opinión ye la d’un meru llector de periódicos que tien interés nel tema. Toi lloñe, entós, de toles manipulaciones ya intereses ancultos que se remanaron enantes, a lo llargo y depués d’esti importante alcuentru que, albidro, que fueron munchos. Hai demasiaos paises y demasiaes multinacionales con intereses nel tema pa camentar que les coses puedan facese de mou neutral y positivu. Munchos miles de billones (con b) los que se xueguen nel control y rebaxa de lo que ta contaminando’l nuestru planeta. Poro, les actuaciones y les resoluciones que se tomen van más «cara a la galería» que a buscar una solución afayadiza al urxente problema del cambiu climáticu.

Y ye que, coles polítiques actuales, a lo que s’empobina’l mundu ye a un calentamientu d’unos 2,7 graos, mui lloñe del de 1,5º que debiere ser l’oxetivu, anque lo positivo ye que por primer vegada, que  yo sepa, hai un alcuerdu xeneral nel abandonu de los combustibles fósiles, una de les causes mayores del dichu calentamientu. ¿En qué plazu? Ehí les coses yá son más difíciles de concretar porque hai diversidá de paeceres, pero hai que se dar priesa porque les coses nun son como p’andar xugando con elles. Ye bono que los paises más ricos se comprometieren a aportar más fondos y más recursos p’atayar esti aumentu de la temperatura global, pero entovía nun paez qu’abasten pa la urxencia que requier el tema.

Y hai que recordar que too esto, por poco que paeza, llogróse gracies al trabayu y al enfotu de determinaos coleutivos que puxaron abondo, obligando a los paises más desarrollaos a xuntase pa tratar de solucionar la catastrofe: los xóvenes, los líderes indíxenes, los activistes y los países en primer llínea de los impautos climáticos. Ensin ellos, ensin la so  llucha diaria, nin esta cume de Glasgow nin cualisquier otra se tuviere cellebrao porque, como dixi enantes, hai munches y mui poderoses fuercies emperraes en que les coses sigan como tán. Too val con tar de siguir ganando perres y controlando’l mundu. Habrá que siguir cola llucha.