Nun hai manera de que la prensa, la tele y les llamaes «redes sociales» (onde toos pescamos dacuando) dexen de referise al tema de les pasaes eleiciones y a la posiblidá, más bien imposibilidá, de formar gobiernu. El probe Felipe VI -ye una forma de falar- anda alloriáu con eso d’enxareta-y la formación de gobiernu a dalguién, pero nun hai tu tía: naide quier garrar la patata caliente. Rajoy echóse a un llau pa nun quedar «retratáu», pero nun se separtó del too. De xuro esperando a que se «quemen» los que vienen detrás y volver a salir a la palestra. El Sánchez, qu’anda llocu por ser presidente -como cualquier otru políticu, claro- nun sabe/nun contesta con quién podría xuntase pa selo. Pasa como nel xuegu infantil: el d’alantre cuerre muncho, y el d’atrás se quedará. Nun hai sociu bonu. El de nome «oximoronáu» (mira tu un atéu que se llame Iglesias) pásase un poco de llistu y como’l personaxe de «La vida es sueño»: «…vive con este engaño, mandando, disponiendo y gobernando…» como si la cosa dependiere d’él. Qué dicir del de Ciudadanos (¿cómo se llamaba, ho?) qu’anda esapaecíu en combate, emperráu nuna cosa tan absurda como abstenese de too y de toos. Coime, abstenese ye nun participar, pa eso haber quedao en casa. En fin, que la cosa va a tar complicada… pero tendrán que s’arreglar. Porque la mayoría quería (queríemos) acabar col bipartidismu, pero eso lleva a lo qu’hai agora. La xente votó lo que quería y los políticos votaos tienen que pactar. Verbu qu’equí nun se sabe declinar. Tendrán qu’aprender a facelo, ye la marca de los nuevos tiempos
Mira, por exemplu, en Portugal, onde va a haber un gobiernu -puzzle- d’izquierdes con un presidente de la República conservador. Bueno, pues tendrán qu’aprender a respetase y a gobernar ensin que’l país se paralice. ¿Acordaisvos d’aquella pallabra que tuvo tan de moda, que yera «talante». Pues ye llegáu’l momentu de demostrar que se tien. Coles mayoríes absolutes nun fai falta tener talante, sólo dar al botonín del asientu y ganar toles votaciones. Pero agora habrá que facer verdadera política-entendimientu-soluciones.
Y nestos díes principien les primaries n’Estaos Xuníos, o seya, esi circu americanu que monten cada cuatro años a lo llargo y ancho d’esi gran país. Por tener tienen hasta un payasu, porque yá me diréis qué ye si non esi tal Donald Trump, facha, histriónicu, bocayón y xenófobu. Mui mal tienen que tar los americanos pa qu’esi, vamos llamar, paisano, seya’l favoritu de los republicanos. Si gana ye que’l mundu nun tien igua. Y nel otru bandu, los demócrates, tampoco tán pa tirar cohetes, anque la señora Clinton tien un pase y, amás, prestaría ver a una muyer de presidenta de USA. Y l’otru posible, el senador socialdemócrata Bernie Sanders, suena en dalgunos círculos pero tienlo mui difícil p’algamar el votu del gran públicu. Yera lo que faltaba, un «roxu» na Casa Blanca. En fin, seguiremos el circu a ver si los equilibristes nun caen a la red.