Cuando se ta munchu tiempu nel poder, anque seya por medios democráticos, avecen a pasar dos coses: que se relaxen les formes (y tamién les normes), y que termina confundiéndose la visión xeneral de les coses, cola propia de ún. El PSOE lleva gobernando en Xixón, porque les urnes asina lo quixeron, dende’l final del franquismu. Más de trenta años. Nun quixera yo quita-yos nengún méritu a lo que ficieron en munches estayes, el desarrollu de la ciudá y de los servicios asina lo amuesen, y la preba d’ello ye que la xente, convocatoria tres convocatoria, prefiriólos al restu los partíos que se presentaben.
Pero ye llegáu’l casu que, nesti momentu, y por aciu de la política, per primer vez dexen de gobernar pa pasar a la oposición. Otros los sustituyen nesi gobiernu. Otros con nueves idées (igual peores, pero eso nun ye del casu) que traten d’echar a andar acordies cola so forma d’entender les coses. El problema ye que los qu’ hasta agora mandaron y ficieron y desficieron como ellos quixeron, agora piensen que tol mundu tien d’entender les coses como ellos y que, amás, nun tienen por qué pasar por dalgunos trámites que deben paece-yos incómodos ya innecesarios.
El tema cultural ye paradigmáticu: La Cultura ye lo qu’ellos dicen que ye. Y asina, una vez qu’atoparon un «muñecu del pim-pam-pum» pa facer tiru al blancu, creen que nun tienen que desplicar nada de lo que ficieron alegando que too son «cortines de fumu» pa defender al del tiru al blancu. Pero la cosa nun ye asina. Si un informe d’una auditoría diz que se ficieron «alteraciones inxustificaes» en pagos a empreses, que debieren salir a concursu públicu. Que nun se «observaron los principios de publicidá, concurrencia y tresparencia» a los qu’obliga la llei 30/2007. Y que, como resume, se «conculcaron los principios d’una bona alministración pensando nel interés públicu», nun se pue salir cola chulería de: «que lo denuncien nel xulgáu». Non, ustedes tienen la obligación de desplicar a los
ciudadanos de Xixón toes eses supuestes irregularidaes, porque anque paez que les perres que gasten son suyes, nun ye asina. Ustedes nun gasten les perres propies, tán gastando les nuestres y queremos que les cuentes tean clares. Y más cuando tamos falando de miles d’euros. Y ye que, cuando se ye «servidor públicu» (qué mal s’entiende eso), les formes y les normes son perimportantes, anque nun haya delitu o responsabilidá penal. Les formes, eso que despectivamente se llama «la burocracia», ye lo qu’estrema a los paises civilizaos de los que nun lo son.
Otra cosa ye la que se refier al propiu conteníu de lo qu’atalanten por cultura. La presencia de David Bisbal o Mala Rodríguez nun sé si ye cultura o espectáculu, o si dambes coses son lo mesmo, pero yo nun quiero que se subvencione coles mios perres a coses asina. Igual que tuvi dafechamente a la escontra del nomamientu qu’ustedes ficieron del famosu José Luis Moreno, como «programador cultural» na Llaboral, onde tantos millones s’enterraron. El que nos traxo a la Pantoja, y too aquello otro de les entraes que se regalaren a los amigos, mentantu que los que les pagaron quedaben fuera. ¿O ye que yá nun nos alcordamos? Y tampoco nun nos alcordamos del mayor Desastre Cultural de la ciudá, la destruición de les valiosísimes cerámiques de la Campa Torres, sapozaes nun «zulo». O l’aniquilamientu del Patrimoniu Etnolóxicu d’horros y paneres pa una cosa llamada Zalia que, a lo que paez, agora nun funciona. Eso tamién ye cultura. O meyor dicho: Incultura. En fin, nun tengo muncha confianza en que los actuales rexidores municipales faigan les coses al dereches. El camín que lleven nun lo paez. Pero que los otros nun quieran venir a danos lleciones de nada, nun vaya a pasar como col Maestru Ciruela, que nun sabía lleer y punxo escuela.
