Pues la cosa paez que va en serio. Lo de l’anovación de la Ilesia, digo. El Papa Francisco, esclariaes ya les dubies (si dalguna vez les hubo) sobre’l so comportamientu en tiempos de la Dictadura arxentina, ta llanzáu pa consiguir lo qu’otros Papas nin siquier quixeron plantegase: los problemes familiares y sexuales. Pero non pa emplegar eses frases tópiques que los nuestros obispos encárguense de repetir: eso de la familia cristiana, y la xunión eterna d’un home y una muyer, y cuando te plantegues el tema de la sexualidá y los fíos, pues ya sabes, o los que Dios te mande o «abstinencia» total, porque’l famosu métodu d’Ogino produxo descendencia pa enllenar unos cuantos estadios de fútbol.
Non, agora la cosa va daveres. Francisco (vamos terminar llamándolu Pachu, como si fuere de casa) quier saber qué piensa la xente de too esto, y si pue ser ensin entemediarios. Asina, la encuesta qu’acaba de llanzar a los creyentes recueye temes como les rellaciones prematrimoniales, les pareyes de fechu, los separaos o divorciaos que volvieron a casase, les xuniones ente homosexuales, la posibilidá d’adopción d’estos mesmos homosexuales que viven en pareya, el control de la natalidá… Bien ye verdá que’l llinguax col que fai estes entrugues ye conteníu y matizáu pero, en cualquier casu, d’una claridá absoluta.
Toes estes custiones van ser trataes na III Asamblea Sinodal, convocada pol Papa con caráuter “estraordinariu”, lo
cuál quier dicir con “urxencia”, cosa que namás pasare, nel pasáu, en dos ocasiones. La urxencia ye tala, que les rempuestes a eses sangrantes entrugues (39 en total) tienen que tar en poder del Papa enantes del 31 de xineru de 2014. En principiu van empobinaes a los obispos, pero cola “recomendación” de que les treslladen a les parroquies y a los fieles de les sos diócesis. Francisco quier sentir la voz del pueblu de Dios.
El pueblu de Dios asturianu va a tenelo “crudo” col “pastor” que-y tocó pa curiar el rebañu. Yá dixo delles veces que, en realidá, esti Papa nun diz nada nuevo, que sólo cambien les formes, pero que too sigue como siempre. Y ye qu’una de dos, o ye demasiao llistu, o ye demasiao faltosu, pero seya cuál seya’l motivu lo que diz nun s’axusta n’absoluto a la realidá. La realidá ye qu’esti Papa quier conocer y, supongo, solucionar los verdaderos problemes que tien la Ilesia, non con condenes a mandrecha y a manzorga, sinón tratando, como él mesmu diz, “con tenrura a les persones firíes”. ¿Paez-y a monseñor pocu cambiu?
