Nun se trata de qu’apaeciere dalgún documentu que demostrare que don Carlos Marx, l’azote de la Relixón, fuere sacerdote enantes d’escribir el Manifiestu Comunista. Sería mui simpático, pero nun van perehí los tiros. La cosa va de que’l Santu Padre, el Papa Francisco, ente los ocho cardenales que nomó pa la reforma de la Curia escoyó na menos qu’a un Marx: Reinhard Marx. Nun fina ehí la simpática coincidencia, sinón que como aquel otru anatematizáu polos cures, esti Marx tamién nació en Trier, llugar de nacencia de don Karl. Les semeyances podríen acabase yá, pero igual ye prestoso conocer dalgo más d’esti nuevu Marx que tien “el panchu” d’intentar camudar la inmovilista Curia Romana, grupu de presión onde los haya, y que tien más poder que’l propiu Papa.
Pues esti Marx nun ye, llóxicamente, tan revolucionariu como aquel otru, pero nun dexa de tener postures interesantes al rodiu de munchos temes y, una cosa que ye mui d’agradecer, ciertu sentíu del humor del que toos debiéremos tener una bona reserva. Asina, Reinhard Marx acaba publicar, según recueyo del teólogu González Faus nel interesante Boletín de “Cristianisme i Justicia”, un llibru tamién tituláu “El Capital”, y que lleva por sotítulu: “Un alegatu a favor de la humanidá”. Na introducción, anque sopelexa la so postura a la escontra de don Carlos, tien el suficiente sentíu del humor como p’abrila con una carta al so antecesor onde reconoz que, depués de tener renegao d’él, si nun sería demasiao prematuro dalu por finiquitáu a él, y a les sos teoríes económiques, y si nun tendría razón cuando predixo hai ciento cincuenta años que tolos pueblos quedaríemos enxaretaos na rede del mercáu mundial, pa beneficiu únicu del capital.
Esti nuevu Marx, allíniase colos que defenden la “economía social de mercáu” y torna la vista hacia la vieya Doctrina
Social de la Ilesia, de la que destaca que “la solidaridad y la subsiaridad son principios fundamentales de la configuración de la sociedad”, llegando a dicir nidiamente que “considerar al trabayu como una mercancía más, somorguiada a les lleis supuestamente “inquebrantables” del mercáu ye incompatible cola Doctrina Social de la Ilesia”.
L’Obispu Marx “fustiga” al Fondu Monetariu Internacional por nun conocer, ni enantes nin agora, más polítiques que les qu’aumenten los problemes sociales. Denuncia a munches facultaes de Ciencies Económiques onde los estudiantes namás qu’aprenden a facer complicaos cálculos econométricos y concluye diciendo que “el fantasma de Karl Marx saldrá de la tumba para perseguinos.” La mio personal conclusión ye que si tuviéremos más obispos como esti Marx “redivivu”, les coses diríen muncho meyor dientro la Ilesia Católica y volveríase, de dalgún mou, al espíritu del mensaxe evanxélicu. Un puntu pal Papa Francisco.
