Anden los cronistes deportivos mui contentos pol trunfu de la Seleición Española en París. Esti trunfu nun ye sólo que desbroce’l camín del equipu pal mundial de Brasil -dicen- , sinón que reafirma que l’ «estilu Del Bosque» ye’l meyor y sigui funcionando pese a les dubies que se llevantaren (por ellos mesmos, claro). Total, que too bien, somos mui bonos y sobre too «el Marqués de Del Bosque» ye’l meyor entrenador del mundu, como preba del premiu que-y dieron.
Llamento disentir de dalgunes coses. En primer llugar que, el llamáu «estilu Del Bosque», nun ye un inventu d’esti paisanu, sinón que la so aplicación nel equipu español vieno dada por don Luis Aragonés, alies «el sabiu d’Hortaleza». Con esi estilu, apropiáu a los xugadores que tenía, Aragonés ganó la primer Eurocopa, cosa que yá ta emprimando a escaecese pues llega a dicise que Del Bosque ganó «los tres títulos» (dambos europeos y el mundial) Lo que fizo’l Marqués fue aprovechar la esperiencia positiva de don Luis, y de Guardiola nel Barsa, base de la seleición española. O seya que d’innovador, nada, y d’estilu Del Bosque menos: estilu Aragonés o «Guardiolés».
Pero ye que, amás, un entrenador hai que lu midir pola capacidá d’adaptación que tien a cada partíu en concreto. Nun pue ser lo mesmo xugar, por exemplu, escontra Alemania, Francia o Brasil, qu’escontra Andorra o Finlandia. Eso paez una cosa «de caxón». Pues bien, el señor Marqués plantega siempre los partíos como si el rival fuere’l mesmu y, amás, de másima categoría. Asina, l’equipu que sacó escontra Finlandia, que cuasi nos separta del mundial, yera pa fusilalu. ¿Cómo pue xugase escontra un rival que sabes que va a poner a los 11 xugadores nel aria pequeña, con cuatro defenses y un centrocampista defensivu per delantre? ¿Cómo pue xugase escontra esi mesmu equipu con un «falsu nueve»? Resultáu: los cuatro defenses españoles, al borde del aria grande de Finlandia cuntándose chistes, y los otros seis piquiñinos estorbándose ente sí porque nun había sitiu pa toos. Lo llóxico yera xugar, como fai dacuando’l Barsa, con tres defenses, y un delanteru centru «real» abriendo sitiu y forzando rebotes y «segundes xugaes». Cuando a última hora sacó a Negredo, multiplicáronse les ocasiones.
Pero ye qu’esto mesmo yá lo fizo’l Marqués n’otres ocasiones, incluyída aquella derrota escontra Suiza nel Européu que
cuasi nos dexa fuera. Nun apriende. El bon entrenador nun ye’l que xuega siempre col mesmu sistema, sinón el que sabe asitiar a los xugadores en función del rival que-y toque. Esti paisanu munches veces tuvo que rectificar y facer los cambios depués del descansu, a veces cuando yá díbamos perdiendo. Dicen ne prensa: «Del Bosque acertó colos cambios». ¡Coño, non! Del Bosque enquivocóse cola aliniación, por eso tuvo que facer los cambios regalando mediu partíu.
Otra metedura de pata: la colocación de Villa. La forma más cenciella de facer fracasar a Villa ye ponelu de Delanteru Centru, faciéndolu xugar pegáu a los dos centrales. Villa nun tien les carauterístiques fisiques, nin téuniques pa xugar ehí. Ye un xugador que necesita espacios, y posibilidá d’armar el disparu que lu fai con dambos pies. Pa xugar ente los centrales, y d’espaldes a la puerta, hai otros xugadores más afayaízos, como’l mesmu Negredo. Villa trunfa o xugando al contrataque, o con un delanteru tradicional que-y abra los espacios y arrancando dende l’estremu hacia’l centro. Pero pa saber esto nun fai falta ser un premiu Nóbel, vímoslo yá cientos de veces, que Villa nun ye un desconocíu.
En fin, nun quiero dar más la vara col Marqués que, pese a que San Victor Valdés sustituyó a San Iker Casillas, paez que sigui gociando d’un gran cartel. Sinceramente, con esos xugadores lo único que tien que saber l’entrenador ye ponelos a caún nel so sitiu, nun va a enseña-yos nada nuevo. Y si eso nun sabes facelo bien, marcha pa casa. Como dixi n’otra ocasión, el problema d’España nun ye que xuega con un «falsu» nueve, ye que xuega con un «falsu» entrenador. ¡Ah!, pero eso sí, ye un bon paisanu. Y mui educáu.