Pa los qu’atalantamos que la figura de los reis ye una antigualla que debiere desapaecer, y pa los que siguimos considerando que, amás, la dinastía borbónica en particular fue una de les más funestes de toles europées, coses como la «patochada» de Xuan Carlos Primeru per tierres africanes pónnoslo «a guevu». Porque un Xefe del Estáu d’un país modernu, como ye España, nun pue embarcase nun avión priváu y, ensin avisar a naide de la so ausencia, dedicase a tirar tiros a los elefantes de Botsuana. ¿Pero en qué pais tercermundista tamos? ¿Y qué moral y ética tien el másimu responsable oficial español pa, nos peores momentos económicos, sociales y políticos en munchu tiempu, dir a correse unes xuergues colos amigos d’espedición?
Otra vuelta, el diariu más «progre» que tenemos, «El País», pasa percima del tema con una pequeña reprimenda, más centrada en que tien qu’avisar, que nel propiu fechu en sí. El Rei tien derechu «a unos días de asueto y ocio» diz l’Editorial «Percance Real». Pero, coime, nun ye lo mesmo dir al mallorquín Palaciu de Marivent, onde la Familia Real yá pasa abondos díes «de asueto», qu’embarcase nun avión priváu y dir a cazar elefantes al África. Y nun ye lo mesmo, porque una cacería d’eses cuesta 50.000 euros, que se funden nunos pocos díes. Porque nun se trata d’un safari fotográficu, sinón que se trata de dar muerte a esos preciosos exemplares, únicos na creación. (Un paréntesis: la so muyer, doña Sofía, siempre presumió d’ecoloxista y de nun querer llevar abrigos de pieles. ¿En qué queda eso agora?). Y porque se trata de dir a un país col que nun se caltienen rellaciones diplomátiques, colo que, amás, hubo d’intervenir la embaxada española, creo que de Namibia. Y a too esto, la so muyer, de vacaciones en Grecia asistiendo a unes ceremonies relixoses que nun son les de Rouco Varela. La Casa Real dio l’anuncia pasaes 30 hores del socesu, cuando Xuan Carlos Primeru yá taba operáu n’España, y Sofía nun piensa tornar del so país hasta dientro un tiempu. Y eso conocémoslo el 14 d’abril, aniversariu de la República. Paez too ello sacao d’una película de los hermanos Marx.
El casu ye que la xente, pese al cercu mediáticu qu’abelluga a la Monarquía, ta principiando a dase cuenta de que «no es esto, no es esto», como diría Ortega. Que bien ta’l «glamour» y eses coses de les revistes del corazón, pero que la política ye una cosa demasiao seria pa dexala en manes de los Borbones que, a lo que paez, lo único que saben ye disparar tiros y, amás, con mui poca puntería.
