Nesta última Selmana de les Lletres la revista de l’Academia de la Llingua «Lliteratura» publicó un completu númberu nel que destacaben, pola cantidá d’escritores que participaron, una seición empobinada a los microcuentos. Más de 40 rellatos recoyía la revista si bien bastantes d’ellos nun cumplíen la norma de nun esceder de mediu foliu que ye, llinia arriba o abaxo, lo pautao pa esta modalidá narrativa. Paez que nun ye fácil axustar una mínima historia (o una historia mínima) nesa midida esixida.
Con un ciertu retrasu, presentóse esti númberu de Mayu n’Uviéu y en Xixón de mano de la so direutora, Marta Mori, participando dalgunos de los escritores representaos cola llectura del so cuentu. Yo tuvi presente nel actu de Xixón que se cellebró nel Salón d’Actos de la Escuela de Comercio con una asistencia curiosa de públicu. Pa los que nun pudieron asistir a esta xornada lliteraria, darréu asitio nesti blogue’l cuentu que lleva la mio firma y que lleí nel actu reseñáu. Espero que vos preste:
EL PRINCIPIU DEL MUNDU
«Yera esa hora en que la nueche entovía ye nueche pero les primeres rayaes del amanecerín van peñerándose de mou sele, como’l lladrón que se cuela na casa ensin ser vistu. Una trupa borrina aportaba dende’l ríu amestando un tastu d’irrealidá al paisaxe. Pasó la mano pola cara pa quitar unes gotes que nun sabía si yeren muga, sudu o llárimes. O igual un migayín de too ello. ¿Daveres lo que diba aniciar tenía dalgún sentíu? Duldólo. En cualquier casu yá nun había torna posible: había que lo facer y faríalo. ¡Qué más daba que nun valiere pa nada! ¡Que d’aquel actu a la desesperada nun quedare nengún escatafín! ¡Qu’aquello nun fuere más qu’una gota d’agua na inmensidá d’un oceanu! ¡Que naide fuere a saber nunca de la esistencia d’ellos, de los sos desvelos y esmoliciones, de los proyeutos futuros que queríen entamar…! Un llixeru movimientu llamó la so atención. Adulces una rabasera del aire que principiaba a llevantar la nublina. Pero él sabía que nun yera un caprichu del vientu. Yá taben ellí. Preparaos. Dispuestos. Carició firme l’argañosu tastu de la piedra. Esperó’l pasu del tiempu necesariu. Y en cuantes vio asomar pel estrenchu pasu la odiada figura de los sos enemigos, Pelayo llanzó con toles sos fuercies la enorme piedra camín abaxo, haza’l so destín, mentanto de la so boca salía un enorme glayíu onde se xuntaben la rabia y el desesperu. Y anque él nun lo supiere, ellí, naquel precisu momentu, principiaba la historia del nuestru mundu.»
