Esti día vieno como una rabasera de muerte que nos llevó per delantre a dellos notables xixoneses. D’esos que formen parte del Xixón de siempre, o polo menos del Xixón que yo conocí y por eso ye de siempre pa min.
Acabo de falar del fallecimientu de CHANO CASTAÑÓN, y por ello nun vuelvo a referime equí a él. El funeral, como yera d’esperar, atropó a una gran cantidá d’amigos y conocíos que quixeron da-y l’últimu adiós.
TINO LORENZO fue mui famosu como piragüista del Grupo Covadonga. Formando pareya con Joaquín Tuya llegaron ser de lo meyor d’España, ganando dellos títulos nacionales y el Descensu del Sella. Llueu Tuya corrió tamién con Luis García-Blanco y volvió a ganar el Sella. Depués de dexar el deporte, Tino dedicóse en cuerpu y alma al negociu fundáu por so padre, Imprenta la Versal. Tino fue siempre «Tino el de la Versal». Yo fici varies coses con él, pero recuerdo sobre too una anéudota curiosa: mio güelu Vicente tenía un folletucu mecanografíau, que yo heredé yá mui masuñáu, onde se recoyíen cientos de feches, noticies y acontecimientos de la nuestra ciudá. Nun sé, que día se fizo la trayida del agua, en qué fecha se inauguró la Plaza Toros, etc. etc. Un día enteréme qu’aquel folletu yera una copia d’un llibrín editáu pola Imprenta La Versal, tituláu «Efemérides y curiosidades gijonesas», y que diba a reeditase, nuna pequeña tirada, como recordatoriu de su padre. Ellí me presenté y anque yá tenía la tirada comprometida, al ver el folletucu de mio güelu dixo: «Coime, esi interés nun puede quedar ensin recompensa», y regalóme un exemplar que guardo na mio biblioteca. En fin, que descanse en paz esti xixonés famosu y bona persona.
Con ARSENIO GONZÁLEZ pierde’l teatru asturianu un gran autor y un gran actor, y la ciudá de Xixón un de los sos fíos más queridos. Alma mater de la Compañía Asturiana de Comedies, durante munchos años fízonos pensar y sonreir con unos monólogos y unes obres que, pese a la so aparante cenciellez, conservaben parte del sentíu y la forma de ser de los campesinos asturianos. Un tipu de teatru non siempre bien consideráu (los puristes acúsenlu de folklorismu popular y de conservador) pero que supo coneutar cola xente y qu’encartió, a la vez, p’aidar a caltener la nuestra llingua nunos años en que si non ye por ellos tuviese esapaecío. Asina pues, un abrazu mui fuerte pa la so familia y que la tierra-y sea leve al bonu d’Arsenio. La so obra queda ehí pal esfrute de la xente.
Nun llegué a conocelu pero hai un datu que resaltar na muerte de hosteleru xixonés MIGUEL FRIERA GARCÍA: yera
na menos que’l bisnietu del históricu «TARFE», Ataulfo Friera Canal, periodista y escritor mui lligáu a la ciudá, como collaborador del diariu «El Comercio» y como editor de «La Comedia Gijonesa», semanariu humorísticu de gran fama (por cierto, que fue reeditáu por Llibros del Pexe va unos años). No que a min me toca, préstame muncho compartir coleición de noveles con TARFE, pues en «Las novelas de Gijón», editaes por «El Comercio» en 2008, figura la mía, «L’aire de les castañes» y tamién la suya «Manolita Cálvez» con un ilustráu prólogu d’Elena de Lorenzo. De Miguel Friera nun sé muncho más, salvo que yera tamién mui asturianista. Descanse, pues, en paz, el bisnietu del gran Tarfe.
