LO D’IRAK NUN TIEN NOME.- Cada vuelta conócense más detalles de les humildaciones y tratos denigrantes de los soldaos de l’alianza «civilizada», sobre too americanos y británicos, nun sólo a los prisioneros, sinón tamién a la población civil. Esos detalles amuesen la «catadura moral» d’esa xente y de los que los manden. Agora descúbrese que toa esa maldá, que tou esi velenu, nun ye dalgo improvisao, en manes de dalgún soldáu descontroláu. Sinón que respuende a dalgo premeditao que, na menos, bien recoyío nun Manual del tratu al «enemigu», por parte de les autoridaes britániques. ¿Cabe mayor baxeza moral pa los representantes de la civilización? Mentanto, les cifres afiten que más d’un sesenta por cientu (60%) de los muertos na guerra d’Irak, son civiles. Nun hai qu’escaecer pa la Historia, que los nomes de los qu’anicieron la barbarie fueron: Aznar, Blair y Bush. Que figure asina nos Manuales d’Historia que s’estudien nel futuru.
VALLEDOR.- Esti día, Francisco Javier García Valledor, finiquitó’l so tránsitu políticu per Izquierda Xunida, pidiendo
la baxa nel partíu. Podrá pensase lo que se quiera al rodiu de la so deriva política pero, asina como cuando un políticu «cambia de chaqueta» pa medrar, o seya pa fuxir d’un partíu pequeñu a otru más grande y con más posibilidaes, hai que «sospechar» de los sos fines, cuando se da’l casu contrariu siempre merez un respetu. Valledor, fue destacáu parllamentariu y ocupó’l cargu de «ministrín» de Xusticia ya Interior a lo llargo de cuatro años. Tolo dexó por desacuerdu cola llinia política del so partíu. Nun voi dicir que tea d’alcuerdu colo que defendió o defende agora’l políticu asturianu, pero sí que, dende esti modestu blogue, tien el mio respetu. Y que representa un activu políticu que sedría mui triste esbayar.
UNA NUEVA AGRESIÓN.- Ye la que Marruecos acaba causa-y al pueblu Saharahui, por mor de la muerte, d’un disparu, d’un neñu (con 14 años nun se dexa de ser neñu) que pretendía entrar, cola familia, nel campamentu del Aaiún. Mal tienen que dir les coses al vecinu país, cuando nun tienen otru mou d’acallentar les xustes reivindicaciones de los saharahuis que coles armes. Hai que siguir pidiendo que se cumplan les socesives resoluciones de la ONU, nel sen de convocar, nel menor tiempu posible, un referendum d’autodetermín. España nun pu llavase les manes de la so antigua colonia, y tien de tomar una postura firme frente a estes agresiones marroquines. Polo menos hai que les denunciar.
LES LLACERIES DE LOS PROBES.- Paez qu’hai persones y pueblos, condergaos por nun se sabe bien qué dioses, a tener
una esistencia misérrima. Depués de tolo que tien pasao Haití, agora una epidemia de cólera ta cebándose con aquella probe xente. La Ong «Mélicos ensin fronteres» llanza un S.O.S nel que sopelexa que tán sobrepasaos. Pese a los más de 3.000 efeutivos que tienen na zona, nun dan abastu p’atender a los cientos d’enfermos qu’ingresen ca día. Per mui pocu dineru al mes (lo que cuesta tomar un par de botelles de sidra) podemos echar una manina a esa xente que llucha por aidar a los sos semeyantes, y por facer un mundu meyor. (www.msf.es)
