PATRÓN.- Ye esa una costume católica, la de poner a un santu/a que guarde o interceda por una comunidá de persones, seyan una ciudá, un país o un coleutivu de homes y muyeres con una causa común. La cosa tien arraigu dende tiempos inmemoriales, anque realmente agora, nes sociedáes modernes y llaiques nun tenga munchu sentíu. Ensin embargu, resulta una guapa tradición na que la xente participa -el que quier- anque nun seya dafechamente creyente. A mi préstame, por exemplu, la bendición de les agües que se fai en San Pedro, na que participen per un llau la ilesia, y per otru les autoridaes civiles. Y téngolo pasao mui bien sintiendo les «puyes» que se llanzaben el señor párrocu de San Pedro, don Javier Gómez Cuesta, y l’antigua alcaldesa de Xixón, doña Paz Fdez. Felgueroso. Por cierto, siempre paecía muncho más xixonés el cura que l’alcaldesa. Llueu cantaba’l corín de Cimavilla y bendecíense les agües. ¿Ye eso necesario? ¿Tienen d’asistir les autoridaes civiles al actu? Pue ser discutible, anque yo nun veo el porqué una representación de los xixoneses (y quién meyor que’l alcalde) participe nun actu tradicional que tamién pue ser cultura. Agora, lo que sí yá m’indigna y enoxa ye que los caradures del PSOE xixonés, que participaron nel actu cuando tuvieron na alcaldía, reprochen que lo faiga’l que gobierna nel presente. O val, o nun val. Les dos coses al tiempu non.
SAN XUAN.- Paez que va de santos, pero ye que la nueche de San Xuan ye una de les efemerides más importantes
dientro de la cultura asturiana. Nel blogue de David Rivas, por exemplu, fálase un poco d’esa guapa tradición y la de la «flor del agua». Pero equí, n’Asturies, siempre se faló de la «foguera» y de la «nueche de San Xuan», non como na prensa asturiana que nun paren de falar de la Hoguera y de San Juan. Hasta pa eso-yos da vergoña usar la llingua propia. Inclusive podía usase como reclamu distintivu pal nuestru país, tal y como faen los valencianos con «la nit del foc» o la «cremá». Somos fatos hasta pa eso, refugamos lo nuestro hasta pa llanzar un mensaxe distintu qu’atraiga xente. Como falamos de santos, nel pecáu lleven la penitencia.
LOS SINVERGOÑES DEL FMI.- Paecía que la cosa yá taba fecha, y Grecia siguía renunciando a coses (yá s’apautaben en xubir el IVA) cuando esos sinvergoñes del FMI piden más midíes. Une midíes que, amás, van en contra de tolo que se ta faciendo pa salir de la crisis, produciendo más recesión y perxudicando, amás, a los más probes: los pensionistes. Y agora que’l Primer Ministru griegu diz que va a facer un referendum pa que seya’l propiu pueblu helenu’l que decida nesti tema tan sangrante, dicen qu’eso nun val, que ye romper les regles. Paez que lo que se quier ye echar a los griegos del euru, y quiciás hasta de la comunidá europea. Porque si a min dalguién me debe perres, nun puedo afogalu, tendré que dexar que se recupere pa que pueda pagame. En fin, recuerdos, señora Lagarde, que más paez a Lagardere. Famosu pola so «estocada».
