«ALLONS ENFANTS DE LA PATRIE…».- Nun sé por qué pero los trunfos escontra’l nuestru vecín francés saben meyor. Había ganes de revancha depués de que l’añu pasáu nos baxaran del mundial, pero nun paecía qu’esti fuera’l meyor momentu pa saborgala, xugándose nel so país y con un palaciu de deportes atarraquitáu d’un personal con ganes de machacanos. Pero nun cuntaben con una España bastante tocada pero con una enorme seriedá y cola dignidá del que, si muerre, va a facelo coles botes puestes. Con eso y, claro, con un Pau Gasol que paez d’otra galaxia. Too lo fizo bien y xunto a elli el restu l’equipu zarro files, apertó los dientes y tiró p’alantre con ilusión. Total tamos na final del européu eliminando a los favoritos. Nun miento si digo que nun m’importa demasiao cómo queden nel partíu que-yos falta. Home, quiero que ganen, claro, pero pa min lo más grande yá ta fecho. Derrotar na so casa y con aquel ambiente a los franceses. Nin el Xeneral Castaños pudiere facelo meyor.
UN CONSEYERU CON TOLA BARBA.- El probe nun da abastu. Pasáu’l primer afogón del chollu heredáu de les
oposiciones, Xenaro Alonso Mejido, Conseyeru d’Educación, Cultura y peme que dalgo más, principió a espardir les sos redes a la caza y captura de la costera del chicharru. Y cayeron unos cuantos. Presentaciones n’asturianu y eonaviego, asturianu pa los neños de 0 a 3, aumentu na TPA d’espacios en llingua pero que supongan una normalización social (entendemos Telediarios, documentales, espacios de debate, etc.), más dotación pa l’Academia de la Llingua, que bien la necesita, y como norma xeneral llevar hasta’l másimu les posibilidaes de les lleis actuales, que nun son poques. Tou un «tour de force» nun tiempu record, Veremos cuánto de too esto pue llevar alantre, pero polo menos a la so actitú militante en favor del asturianu hai que da-y mui bona nota. Llueu hai otres coses que nun dependen d’él.
CATALANES Y/O ESPAÑOLES.- Tiénenme tan fartuques les dos partes y siento tantes mentires poles dos partes que, yá que puedo, voi pasar d’escribir d’ellos. Ellos tampoco escriben de nosotros, asina que tamos empataos.
