ROSALÍA.- Nesti casu nun falo de la cantante de moda qu’enllena páxines y cámares de televisión a fargataes, sinón d’otra muncho más humilde y que tardó munchu más tiempu en ser reconocida: la gran Rosalía de Castro. Siempres ye bon momentu pa volver a recordala, pero fáigolo nesti casu por un homenaxe que-y dedicó esti día l’Ateneo Jovellanos de Xixón que xunió, según los entamadores, «letras, música y pintura». Nel actu, la doctora en filoloxía María Martínez Cachero dixo, ente otres coses, que «vivió en el olvido por ser mujer y por haber escrito en lengua gallega, una lengua menospreciada en aquellos tiempos». Xenial. Soscríbolo dafechu, cómo non facelo… Lo que me da pena ye que’l mesmu Ateneo y la mesma filóloga nun convoquen más actos como ésti y nun llevanten la voz en favor de munches otres escritores, nesti casu asturianes, tamién marxinaes por ser muyeres y por escribir n’asturianu, una llingua menospreciada tovía nestos tiempos. Nun fai falta dir tan lloñe p’atopar otros modelos que defender.
FORO.- «Morrió matando», podía ser l’epitafiu políticu del señor Álvarez Cascos, especialista n’harikiris y no que se llama «fueu amigu»: o seya disparar sobre los tuyos, como nel cuartel del Simancas. Si’l partíu qu’él creó y qu’él ayudó a facer marxinal tenía dalguna posibilidá de sobrevivencia, acaba dinamitala poniéndose un chalecu d’esplosivos y tirando de l’anillu. Duldo de que la bona voluntá y la intelixencia política de la única persona que podía reflotar el partíu, Carmen Moriyón, seya quien a llogralo porque, mentanto ella achica agua como puede y trata de garrar el timón con fuercia, los amigos del suicida, hachu en mano, siguen abriendo víes d’agua peronde intenten fundise col barcu al gritu de «yo nun abandono esti barcu». Paezme que con esta guapa metáfora marinera queda dicho too sobre’l tema: ¡Moriyón, arría les llanches salvavides y dexa que se fundan toos ellos!
PRESUPUESTU EN XIXÓN.- Siguen les conversaciones ente’l gobiernín de la Casa Conceyu de Xixón col grupu de Podemos pa poder pautar un Presupuestu. Dalgo que ye novedá pue nos años de gobiernu de la señora Moriyón nun hubo manera d’alcordar nada. Nun sé de quién fue la culpa. O sí lo sé, pero azorramplo. El casu ye que munches de les peticiones que fizo’l grupu comandáu pola dilixente Yolanda Huergo paez que tán aceutaes. Non toes, claro. El problema ye que, como les perres son fabes contaes, pa dalo a delles coses hai que lo quitar d’otres. Y, claro, en vez de tratar de quitalo d’otros gastos más prescindibles, quítenlo de cultura ya identidá. Esapaeció l’interesante Festival del Arcu Atlánticu que, en llugar de potencialu corrixendo los fallos qu’hubiere, diéron-y carpetazu, camudáu por una cosa indefinida que naide sabe que va a ser y que la Conceyala de turnu define como: «un festival centrado en la cultura atlántica asturiana, que se celebrará en setiembre, preferentemente en Cimavilla». Esplíqueme la diferencia, porfa. Xunto a ello, la mayoría les perres pa cubrir les peticiones de Podemos salen de lo presupuestao pa les obres de la Tabacalera (sumando lo que pon «El Comercio» mediu millón d’euros). Un proyeutu que podía ser prestosísimu, aprovechando tolos restos romanos y medievales que van atopándose, pa facer un verdaderu muséu d’Historia de la ciudá. Ocasión desaprovechada. Eso sí, van poner ellí la sede del festival de cine, como si nun hubiere tropecientos mil llocales p’asitialu. Yo, que Podemos, pensaba un poco too eso de les perres y d’onde van salir. Nun sé si paga’l tiru.
